Tadbirda “Uzbekneftgaz” rahbariyati, sohaning mas’ullari, hamda ommaviy axborot vositasi vakillari va blogerlar ishtirok etdi.

Anjuman sohada amalga oshirilayotgan islohotlarning mazmun-mohiyatini ochib berish, erishilgan natijalarni jamoatchilikka yetkazish hamda ochiqlik va shaffoflikni ta’minlash maqsadida tashkil etildi.

Matbuot anjumanida ta’kidlanganidek, “Dolzarb 100 kunlik” dasturi qisqa vaqt ichida o‘zining amaliy samarasini bera boshlagan. Xususan, geologiya-qidiruv, burg‘ilash, qazib chiqarish, qayta ishlash, investitsiya siyosati va ijtimoiy yo‘nalishlarda tizimli o‘zgarishlar kuzatilmoqda. Dastur doirasida, eng avvalo, moliyaviy barqarorlikni ta’minlash, xarajatlarni maqbullashtirish va ishlab chiqarish samaradorligini o‘shirishga alohida e’tibor qaratildi. Keltirilgan ma’lumotlarga ko‘ra, sarf-xarajatlarni tizimli qisqartirish va optimallashtirish natijasida joriy yilning dastlabki choragidayoq 2,5 trillion so‘mlik iqtisodiy samara qayd etildi. Shuningdek, tovar-moddiy resurslar va xizmatlar narxlarini pasaytirish, debitor qarzdorliklarni undirish hamda ishlab chiqaruvchilar bilan to‘g‘ridan-to‘g‘ri muzokaralar olib borish hisobiga 1,8 trillion so‘m mablag‘ tejaldi.

Bu borada “Uzbekneftgaz” AJ Boshqaruv raisining moliya, transformatsiya va xususiylashtirish bo‘yicha birinchi o‘rinbosari Suhrob Hamroev quyidagilarni ta’kidladi:

— “Bugungi asosiy maqsadimiz moliyaviy barqarorlikni mustahkamlash, xarajatlarni asosli ravishda qisqartirish va mavjud mablag‘larni eng muhim ishlab chiqarish yo‘nalishlariga samarali yo‘naltirishdan iborat. ‘Dolzarb 100 kunlik’ dasturi qisqa muddatda aniq natijalar berayotgani buning yaqqol isbotidir,” — dedi Suhrob Hamroev.

Shuningdek, sohaga oid bo‘lmagan aktivlarni tasarrufdan chiqarish orqali dastlabki uch oyda ularni saqlash xarajatlari 30 milliard so‘mga qisqartirildi. Qurilish va burg‘ilash loyihalari qiymatini optimallashtirish hisobidan esa yil boshidan buyon 438 milliard so‘m mablag‘ tejaldi. Geologiya-qidiruv ishlari ham yangi bosqichgako‘tarilmoqda. 2026 yilda jami 10 ming kvadrat kilometr hajmda 3D seysmik ishlar amalga oshirilishi rejalashtirilgan bo‘lib, bu o‘tgan yilga nisbatan 4 barobar ko‘pdir. Shuningdek, yer qa’ridan samarali foydalanish maqsadida 42 ta investitsiya bloki bo‘yicha ruxsatnomalar olindi.

Burg‘ilash sohasida joriy yilda “Uzbekneftgaz” tarixidagi eng katta hajm ko‘zda tutilgan. Jami 102 ta quduq burg‘ilash rejalashtirilgan bo‘lib, shundan 57 tasi izlov-qidiruv, 45 tasi esa ishlatish quduqlaridir.

Qazib chiqarish yo‘nalishida ham muhim natijalar qayd etildi. Joriy yil boshidan shu vaqtgacha 17 ta quduqdan sanoat miqyosida gaz oqimi olindi, Qoraqalpog‘iston Respublikasida esa 3 ta yangi kon aniqlandi. Shuningdek, 29 ta quduq ta’mirlandi va 11 ta tеxnologik tadbir amalga oshirildi.

Qayta ishlash sohasida ham barqaror o‘sish kuzatilmoqda. Bu borada “Uzbekneftgaz” AJning qayta ishlash bo‘yicha o‘rinbosari Abrorjon Xudoyberganov o‘z fikrlarini bildirib o‘tdi.

— “Qayta ishlash yo‘nalishida asosiy e’tibor nafaqat hajmni oshirishga, balki mahsulot sifati, barqarorlik va ichki ehtiyojni to‘liq ta’minlashga qaratilgan. Bugungi natijalar izchil va tizimli ishlarning amaliy samarasi hisoblanadi,” — deydi Abrorjon Xudoyberganov.

Ma’lumotlarga ko‘ra, joriy yilda jamiyat tomonidan 4,789 milliard kub metr tozalangan tabiiy gaz, 141,3 ming tonna gaz kondensati, 152,9 ming tonna suyultirilgan gaz, 48 ming tonna oltingugurt hamda 36,1 ming tonna polietilen ishlab chiqarildi. Aholi va ijtimoiy soha obyektlariga 132,2 ming tonna suyultirilgan gaz yetkazib berildi.

Shuningdek, “Uzbekistan GTL” zavodida sintetik neft mahsulotlarini ishlab chiqarish barqaror yo‘lga qo‘yilib, o‘tgan yilga nisbatan mahsulot hajmi 89,1 ming tonnaga oshdi, o‘sish sur’ati esa 169 foizni tashkil etdi. Investitsiya siyosati doirasida har bir loyiha uning iqtisodiy samaradorligi va strategik ahamiyatidan kelib chiqib baholanmoqda.

 Xitoyning nufuzli CNPC korporatsiyasi tarkibiga kiruvchi kompaniyalar bilan hamkorlik, zamonaviy uskunalar va texnologiyalarni joriy etish bo‘yicha kelishuvlar shular jumlasidandир.

Tadbir yakunida sohada amalga oshirilayotgan ishlar, erishilgan natijalar va istiqboldagi vazifalar yuzasidan jurnalistlar va blogerlarni qiziqtirgan savollariga mutasaddilar tomonidan batafsil javoblar berildi. Umuman olganda, bo‘lib o‘tgan ushbu matbuot anjumani neft-gaz sohasida amalga oshirilayotgan islohotlar, iqtisodiy samaradorlik va ishlab chiqarish ko‘rsatkichlarini jamoatchilikka yetkazishda muhim muloqot maydoni bo‘ldi.

Zulxumor Akbarova