Мәжилисте экономика ҳәм қаржы министри Жамшид Қўчқоров мәлимлеме берди.
- Мәмлекетлик бағдарламадағы тийкарғы бағдарлар ҳәм мақсетлердиң өз ўақтында сапалы орынланыўын тәмийинлеў мақсетинде барлық зәрүр илажлар көрилген. 2024-жылдың жуўмағында жалпы ишки өним өткен жылға салыстырғанда 6,5 процентке артып, 115 миллиард долларға жетти. Мәмлекетлик бюджет дәраматлары 274,4 триллион сумға жетип, 18,4 процентке көбейди. Жыллық инфляция дәрежеси 9,8 процентти қурады.
Сырт ел инвестицияларының көлеми алдынғы жылға салыстырғанда дерлик 1,6 процентке көбейиўине ерисилди. Экспорт биринши мәрте 27 миллиард долларға жетти. Таў-кән, нефть-газ, химия, аўыл хожалығы тараўларында инвестициялардың көлеми еки есеге көбейди.
Халықтың бәнтлигин тәмийинлеў, дәраматларын арттырыў бойынша әмелге асырылған жумыслар өз нәтийжесин бермекте. Бул бағдардағы жумыслар нәтийжесинде кәмбағаллық дәрежеси 2023-жылдағы 11 проценттен 2024-жылы 8,9 процентке қысқарыўына шараят жаратылды, -деди Жамшид Қўчқоров.
