Салық ҳәм Бажыхана комитетлери, Орайлық банк ҳәм Республикалық товар-шийки зат биржасының оператив мағлыўматларына бола, Экономикалық изертлеўлер ҳәм реформалар орайы Өзбекстан Республикасы аймақларының исбилерменлик белсендилигин мониторинг етпекте.
Усы жылдың февраль айы жуўмақлары бойынша салық түсимлери турақлы унамлы өсиў пәтин көрсетип, өткен жылдың усы дәўирине салыстырғанда 31,8 процентке өсти.
Түсимлердиң ең көп өсиўи Наўайы, Сырдәрья, Хорезм, Қашқадәрья ўәлаятларында, сондай-ақ, Ташкент қаласында атап өтилип, орташа өсиў пәти дерлик 33 процентти қураған.
Бажыхана төлемлери 22,7 процентке артты. Ең жоқары көрсеткиш Наўайы - 78 процент ҳәм Наманган - 55,4 процент ўәлаятларында бақланған.
Турақлы унамлы өсиў Ферғана ҳәм Самарқанд ўәлаятлары, Қарақалпақстан Республикасы ҳәм Ташкент қаласында да бақланып, түсимлер орташа 35 процентке өскен.
Сыртқы экономикалық көрсеткишлерди таллаў нәтийжелерине бола, товарлар экспорты 26,1 процентке өскен. Экспорт жеткерип бериўдиң ең үлкен өсиўи Самарқанд ўәлаятында - 95,5 процентке ҳәм Ташкент ўәлаятында - 61,6 процентке артқан.
Соның менен бирге, кредитлеўде сезилерли өсиў бақланды. Көрип шығылып атырған дәўирде коммерциялық банклер тәрепинен ажыратылған кредитлер көлеми 4,8 процентке артты. Ең жоқары өсиў Самарқанд ўәлаятында (+70,3 процент) бақланған. Бухара, Наманган, Хорезм ҳәм Ферғана ўәлаятларында кредитлеўдиң өсиў пәтлери орташа 51 процентке артқан.
Өзбекстан Республикалық товар-шийки зат биржасындағы келисимлер көлеми 40,6 процентке артты. Елимиздиң көпшилик аймақларында, әсиресе, Хорезм ўәлаятында биржа активлигиниң өсиўи атап өтилип, активлик 99,6 процентке артты. Сондай-ақ, өсиўдиң кеңейиўи Сырдәрья, Бухара, Жиззақ ҳәм Наўайы ўәлаятларында орташа 60 проценттен аслам болған.
