Дәслеп Назокат Мардонова (-51 кг) қытайлы Жу Жанг үстинен төрешилер тәрепинен бир аўыздан қабыл етилген қарары менен жеңиске еристи. Мәлимлеме бериўши төреши қоңсылас рингте спортымыздың жеңисин еситтиргенде Севара Маматова (-65 кг) италиялы Амелия Замана менен гүрескен еди.
Италиялы ҳаял белсенди, ал Севара күшли соққы бергиси келгендей күтип тур. Раунд жуўмағында Маматованың сийрек, бирақ анық урып атырғаны мәлим болды: бес төреши де жеңисти оған берди. Екиншисинде Севара нышанды дурыслап, ийегиниң оң тәрепине қаттыға соққы берди, шеректеги төреши Заманениң нокдаунын үш мәртебе есапқа алды. Раунд жуўмағында техникалық нокаут пенен беллесиўди тоқтатты.
80 килограммға шекемги ярым аўыр салмақ категориясындағы Асалой Бахтиёрова да екинши раундта сенегаллы Майрам Сов пенен беллесиўин мүддетинен алдын жуўмақлады. -60 кг салмақтағы Рушанабону Исаева болса үшинши раундта қытайлы Жиаен Вангты техникалық нокаут пенен жеңди. АҚШлы Ариана Чавес пенен өткерилген қурамалы беллесиўде Самира Турғунова (-75 кг) жеңиске еристи, қапталдағы төрт төреши жеңисти оған, биреўи америкалы ҳаялға берди. Алты қызымыздан тек биреўи ярым финалда жеңилди. Нилуфархон Абдуҳошимова (+80 кг) болса төрешилердиң бир аўыздан шешимине бола самоалы Кеалей Переске жол берди.
Төрт жигитимизден үшеўи финалға шықты. Жеңил салмақтағы Абдуғани Ёрқинжонов (-50 кг) дәслепки айланбаларда нокаут пенен қуўантқан болса, ярым финалда ҳиндстанлы Амбекар Меетейге 0:5 есабында бир аўыздан жеңилиске ушырады. Бирақ Сардорбек Баҳромхужаев (-85 кг) грузиялы Зураб Оболадзени, Суҳроб Раҳматуллаев (-75 кг) Жаңа Зеландиялы Георгий Битиевке ҳеш қандай имканият қалдырмады, аўыр салмақ категориясындағы Асадбек Султонбоев болса қоңсылас Түркменстанлы Союнали Овезгелдиевти биринши раундта техникалық нокаут пенен жеңип шықты.
Бул ҳаққында Өзбекстан бокс федерациясының телеграм каналы хабар бермекте.
Демек, еки бронза медалымыз бар ҳәм сегиз боксшимиз финалда қатнасады. Нилуфархон Абдуҳошимова ҳәм Абдуғани Ёрқинжоновты медаллары менен қутлықлаймыз! Ал, финалда қатнасыўшы жуплықлар қурамын кейинирек жәриялаймыз.
