Онлайн сатыўлар жуўмақланғаннан соң компанияға автомобиль сатып алыўды қәлеўши тутыныўшылардан көплеген мүрәжатлар келип түскен, сондай-ақ, шәртнамалардың бир бөлеги машинаға реал зәрүрлик болмаған ҳалда дүзилгени анықланған. Усы мүнәсибет пенен "UzAuto Motors" АЖ Chevrolet Cobalt автомобилин рәсмий дилерлик салонларында сатыўды баслаўға қарар етти.
Енди автомобилди онлайн сатып ала алмаған ҳәр бир қарыйдар буны Chevrolet компаниясының қәлеген рәсмий дилерлик орайында әмелге асырыўы мүмкин. Бунда сатып алыўшы:
қолайлы дилерлик орайын таңлаў;
бар болған автомобилди таңлап алыў;
қосымша үскенени таңлаў ҳәм оны кепиллик шәртлериниң бузылыў қәўпи болмаған ҳалда бирден салонда орнатыў.
Дилер орайларындағы барлық автомобиллер "UzAuto Motors" АЖның бирден-бир системасы арқалы сатылады ҳәм барлық шәртнамаларда шәртнаманың ҳақыйқый екенлигин тастыйықлаўшы QR-код (https://t.me/uzautomotorscom/4025) бар.
2025-жыл 20-ноябрь жағдайына бола, дилерлик тармағына 2 624 "Cobalt" автомашинасы жиберилген болып, соннан 1 969 автомашинасы сатылып, қарыйдарларға тапсырылған. Жақын арада дилерлер жолында 6 мыңға шамалас автомобиль турыпты. Онда, дилерлик орайлары арқалы сатыўлар компанияның онлайн платформа арқалы сатып алынған автомобильлерди жеткерип бериў бойынша миннетлемелериниң орынланыўына тәсир етпейди.
Бүгинги күнде 2025-жыл ноябрьде жеткерип берилетуғын автомобиллердиң ярымынан көби қарыйдарларға берилген. 15-декабрьге шекем шәртнамалар бойынша 2025-жыл декабрь ҳәм 2026-жыл январь айларында жеткерип берилетуғын автомобиллерди толық таярлаў режелестирилген болып, бул "UzAuto Motors" АЖға өз миннетлемелерин алдын ала орынлаў имканиятын береди.
Жақында социаллық тармақларда Chevrolet Cobalt автомобиллерин сатыўда коррупциялық схемалар болыўы мүмкинлиги ҳаққында хабар тарқалды. "UzAuto Motors" АЖ коррупцияның ҳәр қандай көринисине пүткиллей тоқтап болмаў сиясатына әмел ететуғынын атап өтеди. Егер қарыйдарлар рәсмий дилерлик орайларында автомобиллер сатып алыўда нызамға қайшы ҳәрекетлер ямаса дәмегөйлик жағдайларына дус келсе, бул ҳаққында Комплаенс департаментине хабар бериўи мүмкин (https://t.me/uzautomotorscom/4062).
Тергеўде тарқатылған хабардың авторы ҳақыйқый дәлиллер келтирмегенлиги анықланды. Бундай хабарлар "UzAuto Motors" АЖ ҳәм Chevrolet рәсмий дилерлериниң абырайына зыян жеткереди. Компания тексерилмеген мыш-мышларды тарқатпаўды сорап қалады.
"UzAuto Motors" АЖ бәрқулла конструктивлик сөйлесиўге ҳәм қарыйдарлардың ҳуқықларын бузып атырған мүрәжатларын көрип шығыўға таяр", - делинеди компания хабарында.
