Мәмлекетимиз басшысы өзиниң шығып сөйлеген сөзинде дос халықларды бәҳәрги жаңаланыў байрамы Наўрыз ҳәм мүбәрек Рамазан ҳайыты менен қызғын қутлықлады.

- Бүгин халықларымыз ушын ҳақыйқаттан да үлкен ҳәм узақ күтилген байрам. Биз үш мәмлекет шегараларының тутас ноқаты ҳаққындағы тарийхый шәртнамаға қол қойдық. Буннан былай шегаралар - дослық сызықлары, жаңа имканиятлар, дөретиўшилик ҳәм бирге ислесиў мәканы болып есапланады, - деди Президент.

Халықларымыздың муқаддес топырағы, дини, тәғдири бир, тәшўиш ҳәм қуўанышлары, умтылыслары уқсас екени атап өтилди. Енди бул гөззал жерди бүгинги ҳәм келешек әўладлар мүнәсип ҳәм бахытлы жасаўы ушын биргеликте абат етиў бизиң миннетимиз болып есапланады.

Кейинги жыллары улыўма сиясий ерк-ықрар себепли мәмлекетлеримиз арасындағы қатнасықларда үлкен унамлы өзгерислер жүз берди.

Бүгин Өзбекстан менен Тәжикстан арасындағы Аўқамласлық қатнасықлары ҳаққындағы шәртнама күшке кирди. Жақын күнлерде Өзбекстан ҳәм Қырғызстан арасында да усындай ҳүжжетке қол қойылады.

Саўда, инвестициялар, жүк тасыў, пуқаралардың барды-келдиси избе-из көбейип бармақта. Табыслы кооперация жойбарларының саны артпақта.

Бүгинги сөйлесиўлерде исбилерменлик ҳәм мәдений алмасыўлар ушын қолайлы шараятлар жаратыў, тиккелей авиақатнаўлардың санын көбейтиў, шегара алды аймақлардағы қалалар арасында жаңа автобус жөнелислерин жолға қойыў бойынша келисимлерге ерисилгени атап өтилди.

Мәдений илажлар, дөретиўшилик фестиваллар, жаслар форумлары, спорт жарысларын турақлы өткерип барыўға айрықша итибар қаратылды.

- Көркем өнер шегара билмейди, оның уллы ўазыйпасы адамларды бирлестириў. Үш мәмлекеттиң талантлы көркем өнер шеберлериниң атқарыўындағы бүгинги концерт те мәдениятларымыздың байлығы, рәңбәреңлиги ҳәм уқсаслығын және бир мәрте көрсетеди, - деди сөзиниң жуўмағында Өзбекстан Президенти.