Усы ҳүжжетке тийкарланып улыўма орта билим бериў мәкемелеринде жуўмақлаўшы мәмлекетлик аттестация өткерилетуғын пәнлердиң дизими ҳәм имтихан өткериў түрлери, улыўма билим бериў пәнлери және шет тиллерин билиў дәрежесин баҳалаўшы миллий ҳәм халықаралық тән алынған сертификатлардың дизими тастыйықланды.
Оған бола, 9-класс оқыўшыларының жуўмақлаўшы мәмлекетлик аттестациясы:
- Ана тили ҳәм әдебияты пәнинен (тәлим өзбек тилинде алып барылатуғын класслар ушын) - жазба;
- Мәмлекетлик тилден (билимлендириў тили өзбек тили болмаған класслар ушын) - жазба;
- Математика пәнинен - жазба;
- Өзбекстан тарийхы пәнинен - жазба/аўызеки;
- Дене тәрбиясы пәнинен - әмелий формада өткериледи.
11-класс оқыўшыларының жуўмақлаўшы мәмлекетлик аттестациясы:
- Ана тили ҳәм әдебияты пәнинен (тәлим өзбек тилинде алып барылатуғын класслар ушын) - жазба;
- Мәмлекетлик тилден (билимлендириў тили өзбек тили болмаған класслар ушын) - жазба;
- Математика (Тийкарғы) / Математика (Тереңлестирилген) пәнинен - жазба;
- Тарийх пәнинен - жазба;
Оқыўшының таңлаўы бойынша:
Ана тили ҳәм әдебияты (қарақалпақ, рус, қазақ, түркмен, тәжик, қырғыз тиллеринде билим берилетуғын класслар ушын), Биология, Физика, Химия, Мәмлекетлик ҳуқық тийкарлары, География пәнлеринен - жазба;
Шет тили пәнинен жазба/аўызеки түрде өткериледи.
Мағлыўмат ушын, 2025-жылдан баслап билимлендириў өзбек тилинде алып барылмайтуғын улыўма орта билимлендириў мәкемелериниң 11-класс питкериўшилери ушын да Мәмлекетлик тилден жуўмақлаўшы қадағалаў имтиханларын тапсырыў мәжбүрий болыўы белгиленбекте, - делинеди хабарда.
