Олий Мажлис Нызамшылық палатасының депутатлары 14-январь күни өткерилген мәжилисте бир топар депутатлар тәрепинен нызамшылық басламасы ҳуқықы тийкарында ислеп шығылған - "Өзбекстан Республикасының айырым нызам ҳүжжетлерине өзгерислер ҳәм қосымшалар киргизиў ҳаққында"ғы нызам жойбары биринши оқыўда көрип шығылмақта.
Бул нызам жойбары менен төмендегилер белгиленбекте:
пуқаралар жыйыны баслығының ўәкиллик мүддетин үш жылдан бес жылға өзгертиў;
пуқаралар жыйыны баслығының ўәкилликлери мүддетинен алдын тамамланған жағдайда босап қалған орынларға жаңа сайлаў өткериў арқалы пуқаралар жыйыны баслығын бес жыл мүддетке сайлаў тәртибин белгилеў;
Өзбекстан Республикасы Олий Мажлиси Сенаты Кенгашиниң пуқаралар жыйыны баслығы сайлаўын өткериў менен байланыслы ўәкилликлерин Қарақалпақстан Республикасы Жоқарғы Кеңесине, халық депутатлары ўәлаятлық ҳәм Ташкент қалалық Кеңеслерине өткериў;
Пуқаралар жыйынлары баслықлары сайлаўын шөлкемлестириў ҳәм өткериўге көмеклесетуғын республикалық комиссияның пуқаралар жыйыны баслығының сайлаўын өткериў менен байланыслы ўәкилликлерин Пуқаралар жыйынлары баслықлары сайлаўын шөлкемлестириў ҳәм өткериўге көмеклесетуғын Қарақалпақстан Республикасы, ўәлаятлар ҳәм Ташкент қалалық комиссияларына өткериў;
Қарақалпақстан Республикасы, ўәлаятлар, Ташкент қаласы, районлар ҳәм қалалар пуқаралардың өзин-өзи басқарыў уйымларының жумысын муўапықластырыў бойынша кеңеслериниң атын Қарақалпақстан Республикасы, ўәлаятлар, Ташкент қаласы, районлар ҳәм қалалар мәҳәллени қоллап-қуўатлаў кеңеслери етип өзгертиў нәзерде тутылмақта.
