Мектепке шекемги ҳәм мектеп билимлендириўи министрлиги 16 жасқа толған мектеп питкериўшилеринен өз ўақтында паспорт алыўды сорады.
Атап өтилиўинше, абитуриентлердиң ЖООна кириў ушын тийисли ҳүжжетлерди онлайн тапсырыў процесинде питкериўшилердиң паспорт (ID карта) мағлыўматларын ABITUR электрон бағдарламасына киргизиў талап етиледи.
Соның ушын 16 жасқа толған ҳәр бир питкериўши өз ўақтында паспорт (ID карта) алыўы зәрүр екенлиги атап өтилген.
Бул процессте питкериўшилерге және де қолайлық жаратыў мақсетинде Мектепке шекемги ҳәм мектеп билимлендириўи министрлигиниң электрон мағлыўматлар базасы Билим ҳәм маманлықларды баҳалаў агентлигиниң ABITUR электрон бағдарламасы менен интеграцияланған.
Бүгинги күнге шекем быйылғы оқыў жылында мектеплерди тамамлап атырған 450 мыңнан аслам оқыўшының 16 жасқа толған 23 мыңы (5,1%) паспорт (ID карта) алмағанлығы себепли олардың паспорт мағлыўматлары электрон базаға ҳәзирше киргизилмеген.
"Ҳүрметли ата-аналар, әзиз питкериўшилер! Перзентиңиздиң Конституциялық ҳуқықынан пайдаланған ҳалда, өз ўақтында паспорт (ID карта) алыўын тәмийинлеўиңизди, мектеп администрациясынан болса питкериўшилердиң паспорт (ID карта) мағлыўматларын электрон базаға киргизип, оларды келешекте жоқары билимлендириў мәкемелерине ҳүжжет тапсырыўында зәрүр жәрдем бериўиңизди сораймыз", - делинеди хабарда.
