Ғалабалық спорт илажы Жаңа Өзбекстан бағында болып өтти ҳәм онда мыңнан аслам күш структураларының хызметкерлери, жоқары әскерий билимлендириў мәкемелериниң курсантлары, профессионал спортшылар ҳәм ҳәўескерлер қатнасты.
Дәстүрге бола, жарыстың биринши басқышы 14-январь - Ўатан қорғаўшылары күни ҳәм Өзбекстан Республикасы Қураллы Күшлери дүзилгениниң 33 жыллығы мүнәсибети менен шөлкемлестирилди. Екинши басқыш болса май айында, Еслеў ҳәм қәдирлеў күнине бағышлап шөлкемлестириледи.
Жарыс режесине бола күш структуралары командалары жәмәәтлик ҳәм жеке тәртипте өз-ара беллесиўди өткерди. Буннан тысқары, әскерий жоқары билимлендириў мәкемелериниң курсантлары арасында да тап усы еки бағдарда жеңимпаз ҳәм сыйлы орын ийелери анықланды. Әскерий хызметкерлер 3 ҳәм 10 километрлик аралыққа стартқа шығып, әскерий жоқары билимлендириў мәкемелериниң ҳүрметин алты, күш структураларының ҳүрметин болса жети команда қорғады.
Қызықлы ҳәм келисимсиз өткен беллесиўлердиң жуўмағына бола Қорғаныў министрлиги әскерий хызметкерлери көплеген бағдарларда сыйлы орын ийелери қатарынан орын алды. Соның нәтийжесинде ер адамлар арасында 10 километрге жуўырыў бойынша барлық сыйлы орынлар олардың тәрепинен қолға киргизилди.
Сондай-ақ, қызлар арасында да биринши орын Қорғаныў министрлигиниң абырайын қорғаўшы Ҳайитхон Абдуманноповаға несип етти. 3 километрлик ҳәм басқа да бир қатар номинациялар бойынша онға шамалас сыйлы орынлар да әйне Қорғаныў министрлиги әскерий хызметкерлерине тийисли болды.
