Мәмлекетимиз басшысының Бирлескен Араб Әмирликлерине рәсмий сапары шеңберинде Транспорт министрлиги ҳәм БАӘниң абырайлы JETEX компаниясы арасында бирге ислесиў Меморандумына қол қойылды.
Транспорт министри Илҳам Махкамов ҳәм JETEX компаниясының шөлкемлестириўшиси Адел Мардини менен өткерилген ушырасыўда қол қойылған бул меморандум мәмлекетимиз пуқаралық авиациясы тараўында жаңа перспективалы жойбарларды әмелге асырыў ушын тийкар жаратады.
Атап айтқанда, JETEX компаниясы "Ташкент-Шығыс" аэропортында FBO түринде мәмлекетлик-жеке меншик шериклик тийкарында VIP ҳәм CIP клиентлерге хызмет көрсетиўди шөлкемлестириў бойынша инвестициялық жойбарды әмелге асырады.
Бул жойбар шеңберинде киши авиация тараўында оңлаў, сатыў ҳәм сақлаў хызметлери жолға қойылады. Аэротакси хызмети ҳәм VIP такси енгизиледи. Бул болса өз гезегинде туризм тараўының раўажланыўына унамлы тәсир көрсетеди ҳәм VIP клиентлер ушын қолайлық жаратады.
Жолаўшыларға жоқары дәрежедеги хызмет көрсетиўди тәмийинлейтуғын бул жойбардың табыслы әмелге асырылыўы пайтахтымыздың абырайы ҳәм тартымлылығын және де арттырыўға хызмет етеди.
Қалаберсе, мәмлекетимизде бизнес авиация тараўында 200 ден аслам жоқары маманлықтағы жумыс орынларының жаратылыўына ерисиледи. Бир сөз бенен айтқанда, JETEX компаниясының алдынғы тәжирийбесине сүйенген ҳалда мәмлекетимизде бизнес авиациясының исенимли ҳәм турақлы раўажланыўын тәмийинлеўге ерисилди.
Еслетип өтемиз, JETEX компаниясы 2005-жылы шөлкемлестирилген болып, 5 континентте 30 бизнес бирлеспесине ийе глобаллық тармақты қурған. Дүнья бойлап 50 ден аслам ноқатларда, соның ишинде, Жақын Шығыс, Европа, Азия-Тыныш океаны регионы, Африка ҳәм Америкада күни-түни қарыйдарларға хызмет көрсетиў менен шуғылланады.
FBO (Fixed Base Operator) - аэропортларда ҳаўа кемелери ҳәм жолаўшыларға комплексли сервис хызметлерин көрсетиўши, атап айтқанда, ҳаўа кемелерине жанылғы қуйыў, тоқтаў орны, ангарда сақлаў, техникалық ҳәм оңлаў хызметлерин көрсетиў, ҳаўа кемелерин ижараға бериў, чартерлерди сатыў, такси ҳәм басқа да көплеген хызмет түрлерин көрсетиўши шөлкем.
