2025-жыл январь-июнь айларында сырт елден Өзбекстанға келип түскен пул өткермелери 8,2 млрд долларды қурады. Бул 2024-жылдың сәйкес дәўирине салыстырғанда 1,8 миллиард долларға көп (27 процент).
"Қаржылардың 78 проценти Россиядан (6,4 млрд доллар) келип түскен. Қалған бөлеги Қазақстан, АҚШ, Қубла Корея, Түркия, Уллы Британия, Қырғызстан, Литва ҳәм басқа да мәмлекетлердиң үлесине туўра келген", делинеди деректе.
Пул өткермелериниң артыўына өзбекстанлы мигрантлар ислейтуғын мәмлекетлерде жумысшы күшине талап артқаны ҳәм мийнет ҳақылар жоқары дәрежеде сақланып қалғаны себеп болған. Соның менен бир қатарда миллий валюта курсларының беккемлениўи де тәсир еткен.
Орайлық банктиң таллаўына қарағанда, Өзбекстанға раўажланған мәмлекетлерден келип түскен трансшегаралық пул өткермелери көлемлери өсип бармақта. Мәселен, трансфертлердиң көлеми Уллы Британиядан еки есеге, Европа Аўқамы мәмлекетлеринен 41 процентке (Ирландия 2,8 есеге, Литва 79 процент, Нидерландия 44 процент, Польша 20 процент) ҳәм АҚШтан 15 процентке артқан.
Алты ай даўамында физикалық тәреплерге келип түскен пуллардың 4,3 млрд доллары (53 проценти) дәстүрий халықаралық пул өткерме системаларынан жиберилген. Онда өсиў көлеми 2024-жылдың сәйкес дәўирине салыстырғанда 22 процентти қураған. Және 3,6 млрд доллар (44 проценти) сырт елден банк карталарына тиккелей (П2П) өткермелер арқалы келип түскен (өсиў 40 процент). Өз гезегинде 251 млн доллар (3 проценти) банк өткермеси (СWИФТ) арқалы әмелге асырылған (кемейиў 22 процент).
Усы жылдың январь-июнь айларында Өзбекстаннан сырт елге жиберилген пул өткермелери көлеми өткен жыл дәрежесинде сақланып қалып, 1,2 миллиард долларды қураған.
