Атап өтилиўинше, сөйлесиўде тийкарғы тема - шегирткелерге қарсы қорғаныў илажларын күшейтиў болды. Қатнасыўшылар мәмлекетлерде мәўсимлик насекомаларға қарсы гүресиў бойынша нәтийжели илажларды әмелге асырыў бойынша әмелдеги тәжирийбе менен таныстырылды.
Locust.uz системасының презентациясы өткерилди. Бул шегиртке мәйек қойған аймақлар, химиялық тазалаў жумыслары алып барылған аймақлар ҳаққындағы мағлыўматларды жазып алатуғын электрон платформа болып, жағдайды дурыс баҳалаў имканиятын береди. Система, сондай-ақ, транспорт қуралларына орнатылған GPS қурылмалары жәрдеминде арнаўлы үскенелер ҳәрекетин бақлап барады. Бул жағдайды өз ўақтында баҳалаў ҳәм үлкен майданларда шегирткениң тарқалыўының алдын алыў имканиятын береди.
Сөйлесиўлердиң жуўмақлары бойынша тәреплер бирге ислесиўди буннан былай да беккемлеў, халықаралық фитосанитариялық стандартларды енгизиў ҳәм мәлимлеме алмасыўды раўажландырыўға келисип алды. Тәреплер шегара аймақларында шегирткелерге қарсы гүресиў, фитосанитариялық жағдай, үйрениў нәтийжелери, зыянлы организмлердиң тарқалыўы ҳәм көрилген илажлар ҳаққында оператив мағлыўматлар алмасыўын тәмийинлеў бойынша бирге ислесиўге айрықша итибар қаратады. Сондай-ақ, фитосанитариялық сертификатлар ҳаққындағы мағлыўматларды нәтийжели ҳәм турақлы алмасыў ушын мәлимлеме системаларын бирлестириў нәзерде тутылған.
