Онда илимий ҳәм жоқары билимлендириў мәкемелериниң илимпазлары жаратқан қолланба ҳәм ойлап табыўларды өндириске енгизиў мәселелери додаланбақта.
Бул илаж мәмлекетимиз басшысының усы жылдың 20-август күни исбилерменлер менен өткерилген V ашықтан-ашық сөйлесиўинде берилген тапсырмалардың орынланыўын тәмийинлеў мақсетинде шөлкемлестирилген.
Ашықтан-ашық сөйлесиўде Жоқары билимлендириў ҳәм илимий-изертлеў мәкемелери, халықаралық финанс шөлкемлери ҳәм суўды үнемлейтуғын суўғарыў системалары ҳәм комплектлеўши бөлеклерди ислеп шығарыўшы ҳәм қурыўшы кәрханалар және суў хожалығы шөлкемлеринен жәми 240 қәниге қатнаспақта.
Сондай-ақ, илажда Халықаралық суў ресурсларын басқарыў институты (IWMI), Аралды қутқарыў халықаралық қоры, Орайлық Азия мәмлекетлераралық суў хожалығын муўапықластырыў комиссиясының Илимий-мәлимлеме орайы, БМШ Раўажланыў бағдарламасы (UNDP), Германия халықаралық бирге ислесиў жәмиети (GIZ), Корея халықаралық бирге ислесиў агентлигиниң ўәкилханасы (KOICA) ҳәм басқа да халықаралық мәкемелердиң ўәкиллери де қатнаспақта.
Ашықтан-ашық сөйлесиў шеңберинде жоқары билимлендириў ҳәм илимий шөлкемлердиң илимий хызметкерлери тәрепинен жаратылған қолланбалардың презентациясы өткерилмекте.
Атап айтқанда, Ташкент ирригация университети 50, Ирригация ҳәм суў машқалалары илимий-изертлеў институтынан 20, “SUVMASH” АЖ 10, суўды үнемлейтуғын суўғарыў системалары ҳәм комплектлеўши бөлеклерин ислеп шығарыўшы ҳәм қурыўшы кәрханалар 50, басқа да мәкемелер 50 қолланбасын көргизбеге алып келген.
