Ташкент қаласында Орайлық Азия мәмлекетлери арнаўлы хызметлери басшыларының биринши ушырасыўы болып өтти. Бул илаж Өзбекстан Республикасының Орайлық Азия мәмлекетлери басшыларының VII Мәсләҳәт ушырасыўындағы басшылығы шеңберинде шөлкемлестирилди.
Илаждың ашылыўында қатнасыўшыларға Өзбекстан Республикасы Президенти Шавкат Мирзиёевтиң мүрәжаты оқып еситтирилди. Онда Орайлық Азия мәмлекетлери арнаўлы хызметлериниң сөйлесиўи регионаллық қәўипсизликти тәмийинлеў бойынша биргеликтеги қатнаслар ҳәм тәсиршең механизмлерди ислеп шығыўға хызмет ететуғыны атап өтилди.
Ушырасыў даўамында тийкарғы итибар регион мәмлекетлериниң қәўипсизлигине заманагөй қәўип-қәтерлерди баҳалаўдың бирден-бир көзқарасларын ислеп шығыў, сондай-ақ, оларды сапластырыўда арнаўлы хызметлер арасында өз-ара бирге ислесиў нәтийжелилигин арттырыўға қаратылды.
Тәреплер регионаллық қәўипсизлик, терроризм, экстремизм, нызамсыз наркотик ҳәм қурал-жарақ айланысына қарсы гүресиў, трансмиллий жынаятшылық, мәлимлеме ҳәм киберқәўипсизликти тәмийинлеў тараўларындағы әҳмийетли мәселелерди ҳәм өз-ара пайдалы бирге ислесиўдиң басқа да бағдарларын додалады.
Бул илаж Орайлық Азия мәмлекетлери арасында қәўипсизлик тараўындағы бирге ислесиўди раўажландырыўда әҳмийетли басқыш болып, регионымызда тынышлық ҳәм турақлылықты буннан былай да беккемлеў мақсетинде арнаўлы хызметлер басшыларының турақлы ушырасыўларына тийкар салды.
