Бүгин жарыстың ярым финал ҳәм финал ойынлары болып өтти. Атап айтқанда, ярым финалда қарақалпақстанлы студентлер Сурхандәрья ўәлаяты командасына 44:46 есабында, Әндижан командасы Ташкент ўәлаяты гандболшыларына 37:26 есабында жеңилип қалды.
Буннан соң медаллар ушын беллесиўлер өткерилип, онда командамыз гандболшылары Әндижан ўәлаяты командасын 36:26 есабында жеңип шығыўға еристи ҳәм Универсиаданың қола медалын қолға киргизиўге миясар болды.
Ал, финал ойынында болса, Ташкент ўәлаяты гандболшылары Сурхандәрья ўәлаяты командасы менен ушырасып, өз қарсыласларын 38:34 есабында жеңип, алтын медаль ийесине айланды.
Солай етип, пайтахтымызда 4 күн даўам еткен жарыс жуўмағында, Ташкент ўәлаяты гандболшылары биринши, Сурхандәрья ўәлаяты командасы екинши ҳәм қарақалпақстанлы гандболшылар сыйлы үшинши орынларды ийелеўге миясар болды.
Жарыс соңында жеңимпаз командалар шөлкемлестириўшилер тәрепинен диплом, медаль, кубок ҳәм естелик саўғалар менен сыйлықланды.
Жеңимпазларды сыйлықлаў мәресимине Қарақалпақстан Республикасы Жоқарғы Кеңесиниң комитет баслығы Мүрат Атамуратов қатнасты.
Адилбай Оразов,
Қарақалпақстан хабар агентлиги шолыўшысы.
