Салық ҳәм Бажыхана комитетлери, Орайлық банк ҳәм Республикалық товар-шийки зат биржасының оператив мағлыўматларына бола, Экономикалық изертлеўлер ҳәм реформалар орайы Өзбекстан Республикасы аймақларының исбилерменлик белсендилигин мониторинг етпекте.
Усы жылдың январь-ноябрь айларының жуўмақларына бола, салық түсимлери турақлы унамлы өсиў пәтин көрсетип, өткен жылдың усы дәўирине салыстырғанда 16,7 процентке өсти.
Түсимлердиң ең көп өсиўи Наўайы, Ташкент ҳәм Сырдәрья ўәлаятларында, сондай-ақ, Ташкент қаласында атап өтилип, орташа өсиў дәрежеси дерлик 36 процентти қураған.
Дәрамат салығы бойынша түсимлер 20,1 процентке, мүлк салығы бойынша 16,5 процентке ҳәм жер салығы бойынша 21,2 процентке өскен.
Бажыхана төлемлери жыллық есапта 20,3 процентке артты. Ең жоқары көрсеткиш Сырдәрья ўәлаятында - 63,9 процент ҳәм Қарақалпақстан Республикасында - 39 процентти қурайды.
Ташкент, Наўайы, Жиззақ, Наманган ўәлаятлары ҳәм Ташкент қаласында турақлы унамлы өсиў бақланып, түсимлер орташа 30 процентке өскен.
Сыртқы экономикалық көрсеткишлерди таллаў нәтийжелерине бола, товарлар экспорты 12,4 процентке өскен. Экспорт жеткерип бериўдиң ең үлкен өсиўи Сурхандәрья ўәлаятында дерлик 70 процентке ҳәм Самарқанд ўәлаятында 32,3 процентке артқан.
Соның менен бирге, кредитлеўде сезилерли өсиў бақланды. Көрип шығылып атырған дәўирде коммерциялық банклер тәрепинен ажыратылған кредитлер көлеми 37,7 процентке артты. Ең жоқары өсим Сырдәрья (+78,6 процент) ҳәм Наманган (+49,8 процент) ўәлаятларында бақланған. Сондай-ақ, Бухара ҳәм Наўайы ўәлаятлары және Ташкент қаласында кредитлеўдиң өсиў пәти 40 проценттен артты.
Өзбекстан Республикалық товар-шийки зат биржасындағы саўда көлеми өткен жылға салыстырғанда 21,2 процентке артты. Елимиздиң көпшилик аймақларында, әсиресе, Бухара ўәлаятында биржа активлигиниң өсиўи атап өтилип, 35,9 процентке артқан. Сондай-ақ, Жиззақ, Сырдәря ҳәм Ферғана ўәлаятларында орташа 33 процентке өсиў бақланған.
