Жаңа орай барлық қәлеўшилер ушын ашық болған билимлендириў басламалары, жәмийетлик бирге ислесиў ҳәм дөретиўшилик жойбарлар майданына айланады.
AUT кампусы аймағында жайласқан орай 150 квадрат метр майданды ийелеп, билим алыў, сөйлесиў ҳәм раўажланыў ушын заманагөй имканиятларды өзинде жәмлеген. Кеңисликте илажлар өткериў ушын көп функциялы зал, топарларда ислеў ҳәм тил үйрениў ушын зона, сондай-ақ, сөйлесиў ҳәм рәсмий емес билим алыў ушын кеңислик майданы бар.
Заманагөй технологиялар: ноутбуклар, 3D-принтерлер, VR үскенелери ҳәм жоқары тезликтеги интернет бар. Буннан тысқары, инглис тилиндеги китап фонды ҳәм eLibraryUSA санлы китапханасынан бийпул пайдаланыў имканияты жаратылған.
Америка орайы турақлы бағдарламалар: инглис тили курслары, санлы көнликпелер, исбилерменлик ҳәм инновациялар бойынша шеберлик сабақлары, дискуссия клублары ҳәм тренинглер ушын майданға айланады. Бул басламалар Өзбекстан жетекшилериниң жаңа әўладын таярлаў ҳәм АҚШ пенен бирге ислесиўди беккемлеўге қаратылған.
Ашылыў мәресиминде АҚШ елшиси Джонатан Хеник ҳәм Cintana Education ўәкиллери шығып сөйлеп, орайдың билимлендириў ҳәм мәдений байланысларды кеңейтиўдеги әҳмийетин атап өтти. Лента кесилип, өз-ара түсинисиў ҳаққындағы меморандумға қол қойылғаны рәмзий мәниге ийе болды.
Ташкенттеги Америка орайы жергиликли жәмийетшиликке Америка Қурама Штатлары менен байланысларды беккемлеўге жәрдемлесетуғын ҳәм дүнья билимлендириў және инновациялық ресурсларынан пайдаланыў имканиятын беретуғын American Spaces халықаралық тармағының бир бөлеги есапланады.
