Ҳүжжет санаат кооперациясы ҳәм мәмлекетлик сатып алыўлар тараўында бир пүтин ҳәм муўапықластырылған мәмлекетлик сиясатты қәлиплестириўге қаратылған. Тийкарғы жаңалық - Санаат кооперациясы ҳәм мәмлекетлик сатып алыўлар агентлигиниң шөлкемлестирилиўи, оған Экономика ҳәм қаржы министрлигиниң тийисли ўазыйпалары өткерилиўи белгиленди. Агентлик өндирис шынжырларын раўажландырыў, базар механизмлерин енгизиў ҳәм локализациялаўды қоллап-қуўатлаўға жуўапкер болады.
Ҳүжжетте мәмлекетте комплектлеўши бөлеклер, шийки зат ҳәм материаллар ислеп шығарыўды өзлестириў арқалы экономиканың импортқа байланыслылығын азайтыў, Өзбекстан кәрханаларын глобал жеткерип бериў шынжырларына интеграциялаўға айрықша итибар қаратылған. Киши ҳәм орта бизнести ири кәрханалардың өндирис шынжырлары ҳәм инвестициялық жойбарларға тартыў мәселелерине айрықша итибар қаратылды.
2026-жылдан санаат кооперациясын раўажландырыўға бағдарламалық қатнас енгизиледи - тармақлар, аймақлар ҳәм экономиканың драйвер секторлары бойынша орта ҳәм узақ мүддетли бағдарламалар қәлиплестириледи. Сондай-ақ, Агентлик өзлестириўге усыныс етилген бәсекиге шыдамлы өнимлердиң дизимин жәриялап, оларды ислеп шығарыўды жолға қойған исбилерменлер менен кепилликли сатып алыў шәртнамаларын дүзиўди баслайды.
Пәрманның әҳмийетли элементи финанслық қоллап-қуўатлаў болып есапланады: Агентлик жанында Санаат кооперациясын раўажландырыў мәмлекетлик мақсетли қоры шөлкемлестириледи. Оның есабынан жеңиллетилген кредитлер, технологиялар трансфери, брендлерди сатып алыў ҳәм санаат стартапларын раўажландырыў ушын субсидиялар бериледи.
Реформалардың өз алдына блогы мәмлекетлик сатып алыўларға бағышланған. Сатып алыўларды лотларға бөлиў, жыйынды ийелик етиў баҳасы усылы, жергиликли ислеп шығарыўшылар ушын баҳа преференциясы ҳәм қатнасыўшыларды баҳалаўдың электрон скоринг системасы енгизиледи. 2027-2028-жыллардан баслап сатып алыўларда тек ғана сертификатланған сатып алыўшы қәнигелер болғанда қатнасыў мүмкин болады.
Пәрманда, сондай-ақ, жаңа кадрлар сиясатының тийкарлары - инвестициялық жойбарлар ушын қәнигелер таярлаўдан баслап, санаат кооперациясын раўажландырыў ҳәм жаңа түрдеги өнимлерди өзлестириўге тартылған хызметкерлерди материаллық хошаметлеўге шекемги бағдарлар белгилеп берилген.
Улыўма етип айтқанда, ҳүжжет мәмлекеттиң муўапықластырыўшы сыпатындағы ролин күшейтиў, бирақ базар механизмлери, бәсеки ҳәм бизнестиң басламасына сүйенген ҳалда, жергиликли өндиристи раўажландырыўдың узақ мүддетли архитектурасын қәлиплестиреди.
Ҳүжжет Нызамшылық мағлыўматлары миллий базасында жәрияланған ҳәм 07.02.2026-жылдан күшке кирди, деп жазады «Norma».
