Атап айтқанда, социаллық хызметлер ҳәм жәрдем көрсетиўде тәртип-қағыйдаларды бузғаны, социаллық қорғаў уйымлары хызметкерлериниң нызамлы жумысына тосқынлық еткени, нызамшылықта нәзерде тутылған талапларды орынламағаны ушын ҳәкимшилик жуўапкершилик белгиленди. Майыплығы болған шахслар ушын қолайлы шараятлар жаратылғаны ҳаққындағы жуўмақларды жалған ҳүжжетлерден пайдаланған ҳалда алыў әмелиятының алдын алыўға айрықша итибар қаратылды.

Ҳәкимшилик жуўапкершилик ҳаққындағы кодекске ҳәм "Лицензиялаў, руқсат бериў ҳәм хабардар етиў тәртиби ҳаққында"ғы нызамға тийисли өзгерислер киргизилди.

Буннан тысқары, "Пуқаралардың денсаўлығын сақлаў ҳаққында"ғы, "Нотариат ҳаққында"ғы, "Банк сыры ҳаққында"ғы, "Баҳалы қағазлар базары ҳаққында"ғы, "Кредит мәлимлемеси алмасыўы ҳаққында"ғы, "Дәри қуралларынан пайдаланыў менен байланыслы кеселликлердиң алдын алыў ҳәм оларды емлеў ҳаққында"ғы нызамлардың нормаларына өзгерислер киргизилди. Бул дүзетиўлер Социаллық қорғаў миллий агентлигиниң социаллық хызметлер ҳәм жәрдем көрсетиў ушын зәрүр болған мағлыўматларды қайта ислеў ўәкилликлерин беккемлемекте.

Нызам менен Салық кодексине ҳәм "Майыплығы болған шахслардың ҳуқықлары ҳаққында"ғы нызамға да өзгерислер киргизиў нәзерде тутылмақта.

Атап айтқанда, "Социаллық қорғаўдың бирден-бир реестри"не ямаса "Кәмбағал шаңарақлар реестри"не киргизилген шаңарақларға тиккелей финанслық жәрдем сыпатындағы қәўендерлик жәрдемлериниң салыққа тартылмайтуғын муғдары салық дәўири даўамында БЕМның 100 есесине шекем арттырылды. Майыплығы болған шахслар, ветеранлар, ҳаял-қызлар ҳәм балалар жәмийетлик бирлеспелериниң реестринен көширмелер алыў ушын мәмлекетлик бажы төменлетилди, медициналық-социаллық эксперт комиссияларының жумысы жетилистирилди.

Ҳүжжет Нызамшылық мағлыўматлары миллий базасында жәрияланған ҳәм 17.12.2025-жылдан күшке кирди, деп жазады «Norma».