"Санкт-Петербург" кварталы Өзбекстан пайтахтының қурылып атырған "Жаңа Ташкент" районында қурылады. Бул ҳаққында Россияның Өзбекстандағы саўда ўәкилханасының баспасөз хызмети хабар бермекте.
"Жақында Өзбекстан пайтахтының қурылып атырған "Жаңа Ташкент" районында "Санкт-Петербург" кварталын қурыў ҳаққындағы Меморандумға қол қойыў мәресими болып өтти. Архитектуралық жойбарды петербургли қәнигелер ислеп шығыўы режелестирилмекте," - делинеди tass.ru хабарында.
Ташкент қаласының Бас режеси 2045-жылға шекем пайтахттың "Жаңа Ташкент" районының қурылысын нәзерде тутады. Оның майданы 20 мың гектарды қурайды ҳәм бул заманагөй Өзбекстанның бас қала қурылыс режеси есапланады.
Бул районның дәслепки жасаў ҳәм инфраструктура объектлериниң қурылысы усы жыл апрель айында басланған. Тийкарғы объектлердиң қурылысы болса 2045-жылға мөлшерленген. Келешекте барлық мәмлекетлик мәкемелердиң "Жаңа Ташкент"ке көширилиўи күтилмекте. Жойбар авторлары бул Ташкент қаласын автомобиль тығылысларынан сезилерли дәрежеде жеңиллестиреди, деп есаплайды.
