Таныстырылымда «Янги авлод» арнайы өнеркәсіп аймағын дамыту жобалары талқыланды.
774 гектар аумақта құрылған бұл аймақта бүгінде 268 гектарда жалпы құны 800 миллион долларды құрайтын 28 жоба іске асырылуда. Бұдан бөлек, 300 гектарда орналасатын тағы 30 жоба бойынша инвесторлар айқындалып, олардың жалпы инвестиция көлемі 400 миллион долларды құрап отыр.
Өнеркәсіп аймағын кеңейту, жаңа өндірістік қуаттарды орналастыру арқылы жұмыс орындарын көбейтіп, жоғары қосылған құны бар және технологиялық өнімдер өндіруді жолға қоюдың маңызды екені айтылды.
Мысалы, өнеркәсіп аймағы аумағында 288 миллион доллар инвестиция есебінен мультимодальды логистика терминалын салу жобасы қарастырылды.
Аталған жоба Дубайдың «DP World» компаниясымен бірлесіп жүзеге асырылады. Терминал пайдалануға берілгеннен кейін Ташкент қаласы мен Ташкент облысының логистикалық мүмкіндіктері артып, экспорт және импорт операцияларының жылдамдығы едәуір жоғарылайды.
Сонымен қатар ел астанасында жол-көлік инфрақұрылымын жақсарту бойынша жүзеге асырылатын жобаларға қарастырылды. Атап айтқанда, Шота Руставели көшесіндегі тәжірибеге сүйене отырып, BRT (Bus Rapid Transit) жүйесіне негізделген қоғамдық көлік желісі тағы 10 көшеде енгізілетіні айтылды.
Жол қозғалысының қауіпсіздігін арттыру, көлік ағынын реттеу және қала келбетін бірыңғай дизайн-код негізінде жақсарту мақсатында дайындалған іс-шаралар да талқыланды.
Келесі жылы махаллаларды абаттандыру, гастрономиялық көшелер салу және суару жүйелерін жаңарту жұмыстарына жергілікті бюджеттен 1 триллион сум бөлінетін болды.
Мемлекет басшысы Ташкент қаласында жүргізіліп жатқан жаңғырту жұмыстары ең алдымен адамдардың өмір сүруіне қолайлы, заманауи орта қалыптастыруға, сондай-ақ экономикалық белсенділік пен кәсіпкерлік әлеуетін арттыруға қызмет етуі тиіс екенін атап өтті.
Таныстырылым барысында басқа өңірлердегі ірі жобалар туралы да ақпарат берілді. Атап айтқанда, Бұхара қаласының туристерді қабылдау және оларға қызмет көрсету мүмкіндіктерін кеңейту бойынша жаңа жоспарлар қаралды.
