Готеборг университети профессори Хенрик Павиа бошчилигидаги бир гуруҳ экологлар сувдаги карбонат ангидрид концентрациясининг ортиши Fucus vesiculosus турига қандай таъсир кўрсатишини ўрганишди.
Тадқиқот шуни кўрсатдики, сувдаги карбонат ангидрид концентрациясининг уч баравар ошиши мазкур сув ўти ҳаётида сезиларли ўзгаришларга олиб келди. Ўсимликнинг поялари анча мўртлашди, бунинг натижасида улар тўлқин кучига ва табиий офатларнинг бошқа кўринишларига бардош бера олмай қолди. Бу, айниқса, очиқ жойларда ўсадиган сув ўтларига кўпроқ тааллуқли – уларнинг омон қолиш имкониятлари икки бараварга камайди. Олимларнинг таъкидлашича, бундай ўзгаришлар жаҳон океанларининг кислоталаниши оқибатида Fucus vesiculosus ҳужайраларидан кальций ва магний ювилишининг тезлашиши билан боғлиқ.
Бу элементларнинг бирикмалари сув ўтлари пояларининг асосини ташкил этувчи толалар ҳосил бўлишида муҳим роль ўйнайди, шунинг учун уларнинг етишмаслиги Fucus vesiculosus пояларининг мустаҳкамлигини пасайтиради, деб хабар беради tass.ru.
Экологларнинг фикрига кўра, шунга ўхшаш ҳолатлар бошқа сув ўтлари билан ҳам содир бўлади, бу эса иқлим ўзгариши билан боғлиқ салбий ҳолатларга ечим топилмаса, уларнинг қирғоқ экотизимларида омон қолиши қийинлашиб боради.
