Орадан йиллар ўтиб, аёл тадбиркорлик билан шуғулланишни ният қилади. Ўзича қайси йўналишда иш бошлаш яхшироқ экани ҳақида ўйлайди. Бири маъқул келгандек бўлади, яна бошқасига унчалик хоҳиши йўқ. Охири яқинлари билан маслаҳатлашди. Тажрибали мутахассислар ишини ўрганиб чиқди. Бироқ бошлаётган иши ҳақида озгина тушунча бўлмаса қийин экан. Шу сабаб ҳеч бир ишга қўли бормади.
Бир куни хаёл билан қўлига игна олиб, оппоқ матога кашта тика бошлади. Қисқа муддатда ўзига хос нафис кашта пайдо бўлди. Зайнура опа бу ишидан завқланиб, яна давом эттирди. Тайёр кашталарни кўрсатган куниёқ қўшнилари харидор бўлди. Аёл шу тариқа ўз йўлини топганди. Аста- секин буюртмалар ҳам қабул қила бошлади.
Кўп ўтмай, “Кеш грант сити” оилавий корхонасига асос солди. Шундан сўнг ҳунармандликни йўлга қўйди. Кашта, дўппи, тўн, келинларбоп миллий либослар тика бошлади. Шаҳрисабз туманидаги бандлиги таъминламаган хотин-қизларни ишга олиб, ўзи уларга ҳунар ўргатди.
— 2015 йилда фаолиятимни бошлаган бўлсам, шу пайтга қадар 500 га яқин шогирд тайёрладим, — дейди Зайнура Ҳошимова. — Ҳозир корхонамизда 70 аёл меҳнат қилмоқда. Шулар қатори имконияти чекланган 30 хотин-қизни ҳам ишга олганмиз. Юмушимиз унча оғир эмас. Кўпчилик уйда ишлайди. Бажарган ишига қараб ҳақ тўлаймиз. Миллий услубда тикилган кийимларга талаб юқори. Шу боис, маҳаллалардаги уй бекалари билан ҳам келишув асосида ишлаймиз. Яъни керакли мато билан таъминлаб, буюртма берамиз. Бу усулдаги иш биз учун ҳам, уй бекалари учун ҳам қулай.
Тадбиркор кейинги пайтда ногиронлиги бор хотин-қизларга ҳунар ўргатиш учун ўқув курсини ҳам очган. Қизиқувчилар курсда уч ой касб сирларини ўрганиб, ҳамкорликда меҳнат қилиши мумкин.
— Иккинчи гуруҳ ногирониман. Илгари бирор жойда ишлаб, даромад топишни жуда хоҳлардим. Лекин ким ҳам мени ишга оларди деган хаёлда юрардим, — дейди Зулайҳо Ғофурова. — Бу ерда ҳунармандлик йўналиши очилганини эшитиб, ишонқирамай келгандим. Зайнура опа ҳеч иккиланмай қабул қилди. Ўзи ўқитиб, ҳунар ўргатди, ишга ҳам қолди. Жуда мамнунман. Момоларимиздан қолган миллий ҳунармандликни давом эттиряпмиз. Ёшларга ўргатамиз. Биз тиккан буюмлардан одамлар фойдаланаётганини кўриб, хурсанд бўламиз. Бу ишга меҳримизни янада оширади. Ҳозир ойига 3 миллион сўмга яқин маош оляпман. Рўзғорга нафим тегяпти. Ўзимни оилам, жамият учун керакли инсон сифатида ҳис қиляпман.
“Кеш грант сити” оилавий корхонаси ҳозир Шаҳрисабз туманидаги 1-техникумда фаолият юритяпти. Бу техникумда ўқиётган ёшлар учун жуда қулай. Тадбиркорнинг таъкидлашича, мазкур техникум ўқувчиларидан 20 га яқини корхонага ишга қабул қилинган. Улар ҳам ишлаб, ҳам ўқишни давом эттирмоқда.
Давлатимиз раҳбарининг 2025 йил 23 октябрдаги “Касбий таълим тизимида ислоҳотларни амалга ошириш чора-тадбирлар тўғрисида”ги қарорига кўра, 2030 йилга қадар тизимни ислоҳ қилишнинг асосий мақсадли кўрсаткичлари белгилаб берилган. Жумладан, 9-синф битирувчиларининг касбий таълимга қамровини амалдаги 29 фоиздан 50 фоизга етказиш, дуал таълимни жорий этиш белгиланган. Мазкур қарор ижросини таъминлаш учун ҳудудларда муайян ишлар қилинмоқда. Ёшлар касб-ҳунар ўрганиши учун қулай шароит яратиляпти.
Хусусан, Шаҳрисабз туманидаги 1-техникумда 961 йигит-қиз таҳсил олади. Асосан, қишлоқ хўжалиги йўналишига ихтисослашган ўқув масканида ёшларнинг ҳам ишлаб, ҳам таълим олиши учун қатор корхона ва муассасалар билан ҳамкорлик йўлга қўйилган.
— Ўтган йили Зайнура Ҳошимова раҳбарлигидаги миллий ҳунармандлик маркази масъулларини техникумимизга таклиф этгандик. Тадбиркор биз билан ҳамкорлик қилишга рози бўлди. Шундан сўнг фаолият юритиши учун бўш турган бинодан жой бердик. Бу ёшлар учун ҳам катта имконият, — дейди техникум директори Ўткир Туропов. — Ҳозир ўқувчиларимиз мунтазам иш ўрганмоқда. Автомобиль устахоналари, ишлаб чиқариш цехлари раҳбарлари билан келишув тузганмиз. Шунингдек, ўқув муассасамизда қишлоқ хўжалиги йўналиши бўйича ҳам амалий билим берилмоқда. Таълим сифатини ошириш, замонавий ўқув қуроллари харид қилиш ҳамда фаол ўқитувчи ва ўқувчиларни доимий рағбатлантириб бориш учун қўшимча маблағ ишлаб топишга ҳам ҳаракат қиляпмиз. Жумладан, техникумда ҳозир ўрдакчилик йўлга қўйилди. Чорвачилик ташкил этилган. Кўчатчилик боғи ҳамда иссиқхона мавжуд. Умумий ҳисобда жорий йил якунига қадар бир миллиард сўм ишлаб топишни мақсад қилганмиз.
— Икки ойдан буён корхонада ҳунармандликнинг ироқи каштачилик йўналишида ишлаб келяпман. Ҳозир техникумда тикувчилик бўйича таҳсил оляпман, — дейди Ситора Маматқулова. — Ўқиш жараёнида ишлаш яхши экан. Чунки амалий тажрибам ошяпти. Шу билан бирга 1,5 миллион сўм маош беришяпти. Иш жойим техникум ҳудудида бўлгани қулайлик туғдирди. Тажрибам ошиши учун астойдил ҳаракатдаман. Касб сирларини пухта ўрганиб олсам, режаларим катта. Келгусида ўзим мустақил тикувчилик цехи очмоқчиман.
Зайнура опанинг айтишича, бугун корхонасида тикилаётган маҳсулотлар Қашқадарё вилоятидан ташқари Хоразм, Бухоро, Самарқанд бозорларида ҳам харидоргир. Ҳатто Тожикистон, Қирғизистон ва Туркияда сотилмоқда. Корхона ойига 300 миллион сўмдан ортиқ даромад кўряпти. Тадбиркорнинг мақсади келгусида янги иш ўринлари очиб, мазкур техникум битирувчи қизларини тўлиқ ишга олиш. Шунингдек, имконияти чекланган хотин-қизлар ҳамда мингдан ортиқ ишсиз бўлган уй бекалари бандлигини таъминлаш ниятида.
Акбар РАҲМОНОВ,
“Янги Ўзбекистон” мухбири
