Бугунги кундаги пандемия шароитида эса такрорий майдонларга экиладиган картошка учун тезпишар уруғлик талаб этилади. Бунинг учун ҳозир фермер хўжаликлари ва бошқа қишлоқ хўжалиги корхоналари ўзидаги мавжуд уруғлардан фойдаланаётган бўлса, уруғликнинг қолган қисми Россия Федерацияси, Қозоғистон ва Голландия давлатларидан олиб келиняпти. Табиийки, бу етиштирилаётган картошка нархининг қимматлашишига олиб келади.
Шу боис, Ўрта Чирчиқ туманининг «Бектемир» маҳалласидаги “GS-BIO” масъулияти чекланган жамияти хориждан келтирилаётган картошкаларнинг янги тезпишар навларини яратиш бўйича фаолиятини бошлади. Жамият раҳбари Боситхон Абдуфатаховнинг таъкидлашича, Жанубий Кореянинг INVITRO биотехнологик инновацион тизими асосида шу кунгача четдан олиб келинаётган “Santo”, “Picasso”, “Navskiy” картошка навларининг уруғлари маҳаллийлаштирилди. Жорий йилда ана шундай усулда 5 миллион дона уруғлик етиштириш мўлжалланаётган бўлса, кейинги йили 50 минг тонна, 2023 йилга бориб эса 500 минг тонна ишлаб чиқарилади.
– Лойиҳага 5 миллион АҚШ доллари миқдорида хориж инвестицияси жалб қилинган бўлиб, унинг 100 минг АҚШ долларига корхона лабораторияси учун хориждан асбоб-ускуналар олиб келинган, – дейди “GS-BIO” масъулияти чекланган жамияти раҳбари Боситхон Абдуфатахов. – Айни пайтда лабораторияда 10 нафар ходим ишлаётган бўлса, бизга ажратилган 5 гектар майдонда иссиқхона комплекси ва уруғлик картошкани сақлаш учун омборхона қуриб битказилгач, яна 100 та иш ўрни яратилади.
Тошкент вилояти ҳокимлиги ахборот хизмати маълумотларига кўра, ҳозирги пайтда ҳудудда ғалладан бўшаган майдонларда такрорий экин сифатида картошка етиштириш масаласига алоҳида эътибор қаратилмоқда. Маълумки, картошка «иккинчи нон» сифатида ҳар бир хонадонда энг кўп ишлатиладиган сабзавот маҳсулоти ҳисобланади. Жорий йилда вилоятда жами 18 минг гектар майдонга картошка экиш белгиланган бўлиб, унинг 6 минг гектари асосий майдонга, 12 минг гектари эса ғалладан бўшаган майдонларга такрорий экин сифатида экилади. Йил якунида жами майдонлардан 533,3 минг тонна, такрорий майдонлардан эса 244 минг тонна картошка олиш режалаштирилган. Агар бу кўрсаткичларни ўтган йилга нисбатан таққосласак, 59 фоизга кўп эканлиги маълум бўлади. Бунинг сабаби пандемия шароитида озиқ-овқат маҳсулотлари хавфсизлигини таъминлашдир.
