Тадқиқот натижалари Гамбургда бўлиб ўтган Европа қандли диабетни ўрганиш ассоциациясининг (EASD) йиллик йиғилишида тақдим этилди.
Олимлар 20 ёшдан 80 ёшгача бўлган 1923 нафар катталар (562 эркак ва 1361 аёл) маълумотларини таҳлил қилишди. Улардан 436 нафари қандли диабет билан касалланган, 352 нафари диабет олди ҳолатида, 1135 нафарида эса қондаги глюкоза даражаси меъёрда эди. Улардан чой ичиш частотаси (ҳеч қачон, вақти-вақти билан, тез-тез ва ҳар куни), шунингдек унинг тури (яшил, қора ёки бошқа чой) ҳақида сўралган.
Кейин олинган маълумотлар глисемик ҳолат билан солиштирилди. Олимлар чойни ҳар куни истеъмол қилганларда диабетга чалиниш хавфи ва қонда қанд миқдорининг сезиларли даражада камайганлигини аниқлашди. Хусусан, ҳар куни чой ичадиганларда ичмайдиганларга қараганда диабет олди ҳолати хавфи 15 фоизга ва диабетнинг иккинчи турига чалиниш хавфи 28 фоизга кам бўлган. Энг яхши натижа қора чой ичганлар орасида кузатилди.
Метаболик жараёнларнинг яхшиланиши, эҳтимол, кучли антиоксидант ва яллиғланишга қарши таъсирга эга бўлган алкалоидлар, эркин аминокислоталар, полифеноллар, полисахаридлар ва уларнинг ҳосилалари каби ферментланган чойнинг ноёб таркиби туфайли содир бўлди. Моддалар ошқозоности бези бета ҳужайраларининг фаолиятини оптималлаштирди, инсулинга сезгирликни оширди, шунингдек, ичакдаги бактериялар таркибини ўзгартирди.
Истиқболли натижаларга қарамай, тадқиқотчилар аниқ хулосалар чиқариш учун кўпроқ синовлар ўтказиш кераклигини таъкидлашди, деб хабар беради lenta.ru.
