Зикр гардид, ки бо Қонуни Ҷумҳурии Ӯзбекистон "Дар бораи Буҷети давлатии Ҷумҳурии Ӯзбекистон барои соли 2021" барои маблағгузории хароҷоти вобаста ба омодагӣ ва гузаронидани интихоботи Президенти Ҷумҳурии Ӯзбекистон, ки моҳи октябри соли равон баргузор мегардад, миқдори ҳадди аксари маблағе, ки ба Комиссияи марказии интихобот ҷудо карда мешавад, дар ҳаҷми 300 миллиард сӯм муқаррар шуд.
Дар асоси талаботи Кодекси интихоботӣ ва стандартҳои байналмилалии интихобот, инчунин омӯзиши таҷрибаи андӯхтаи интихоботи гузашта, тамоми ҷанбаҳои марбут ба омодагӣ ва баргузории интихоботи Президенти кишвар дар ҷараёни ташаккул додани сметаи хароҷот ва ҳамоҳангсозӣ бо Вазорати молия ба назар гирифта шуданд.
Аз ҷумла, пешбинӣ шудааст, ки барои ҳар яке аз 14 ҳавзаи интихоботӣ 56 миллиону 991 ҳазор сӯмӣ ва барои ҳар яке аз тақрибан 10 800 комиссияи қитъавии интихоботӣ 11 миллиону 813 ҳазор сӯмӣ ҷудо карда шавад.
Дар ҷамъомади КМИ қайд карда шуд, ки беш аз 80 фоизи маблағҳое, ки ба комиссияҳои ҳавзавӣ ва қитъавии интихобот ҷудо карда шудаанд, ба музди меҳнат ва ҷубронпулӣ ба аъзои комиссияҳои интихоботӣ, инчунин ба пардохтҳои якдафъаинаи иҷтимоӣ равона карда мешаванд. Инчунин, дар шароити пандемия хароҷот барои хариди воситаҳои муҳофизати шахсӣ ва маводи дезинфексионӣ барои таъмини саломатӣ ва бехатарии аъзои комиссияҳои интихоботӣ ва интихобкунандагон пешбинӣ шудааст.
Тибқи Консепсияи ташкили такмили ихтисоси аъзои комиссияҳои интихоботӣ, ки онро Комиссияи марказии интихобот тасдиқ кардааст, барои чорабиниҳо оид ба омӯзиши номзадҳои ба аъзогии комиссияҳои ҳавзавӣ ва участкавии интихобот ҷалбшаванда, ки бо усули "каскад" ба мақсади баланд бардоштани дониш ва малака ташкил карда шудааст, ҷудо кардани 18,4 миллиард сӯм ба нақша гирифта шудааст. 92 фоизи ин маблағро маоши мураббиён ва аъзои гурӯҳи мониторинг ташкил медиҳад.
Инчунин, Комиссияи марказии интихобот барои хариди таҷҳизоти интихоботӣ, воситаҳои зарурии моддию техникӣ, молҳо ва хидматҳо, инчунин омӯзиш ба муносибати омодагӣ ва баргузории интихоботи президентӣ ба тариқи мутамарказ маблағҳои дахлдор ҷудо мекунад.
Тавре ки дар ҷамъомад қайд карда шуд, тибқи тағйиру иловаҳо ба қонунгузорӣ ва таҷрибаи интихобот, парвандаҳо оиди қонуншиканӣ дар соҳаи ташкил ва гузаронидани интихобот ва раъйпурсӣ минбаъд аз ҷониби судҳои ноҳиявӣ ва шаҳрӣ оид ба парвандаҳои ҷиноятӣ баррасӣ карда мешаванд. Қаблан чунин парвандаҳоро судҳои маъмурӣ баррасӣ мекарданд. Ин низом инчунин дар қарори Комиссияи марказии интихобот мустаҳкам карда шудааст.
Акнун, чунин чорабиниҳои оммавӣ, ба мисли вохӯрӣ бо интихобкунандагон бо огоҳиномаи хаттии ҳокимиятҳои ноҳиявӣ (шаҳрӣ) дар бораи ҷой ва вақти баргузории онҳо камаш се рӯз пеш гузаронида мешаванд. Дар ин ҳолат иҷозати баргузории чорабиниҳои оммавӣ талаб карда намешавад.
Қаблан комиссияи ҳавзавии интихоботӣ оид ба интихоботи Президенти Ҷумҳурии Ӯзбекистон дар ҳайати 9-11 аъзои комиссия ташкил карда мешуд. Ҳар як комиссияи ҳавзавии интихобот ба ҳисоби миёна тақрибан ҳазор комиссияи қитъавии интихоботӣ дорад. Бо назардошти он, ки дар аксарияти аз 1000 комиссияҳои қитъавии интихоботӣ то 3000 интихобкунанда ба қайд гирифта мешаванд, тасаввур кардан душвор нест, ки ба зиммаи аъзоёни комиссияи ҳавзавии интихобот чӣ андоза корҳои азим гузошта мешавад. Мувофиқи Қонуни қабулшуда, ташаккул додани ҳайати комиссияҳои ҳавзавии интихобот оид ба интихоботи Президенти Ҷумҳурии Ӯзбекистон аз ҳисоби 11-21 аъзои комиссия қарори одилона аст.
Дар ҷамъомад инчунин баъзе масъалаҳои дигаре, ки ба салоҳияти Комиссияи марказии интихобот дохил карда шудаанд, баррасӣ гардида, қарорҳои дахлдор қабул карда шуданд, хабар медиҳад хидмати матбуот.
