Qayd etilishicha, bugungi kunda har bir oliy ta'lim muassasasida korruptsiyaga qarshi kurashish “Komplaens-nazorat” tizimini joriy etish va muvofiqlashtirishga mas'ul bo'lgan bo'linma faoliyati yo'lga qo'yilgan. Vazirlikda komplaens nazorat tizimini yo'lga qo'yish bo'yicha hozirga qadar 20ga yaqin me'yoriy hujjatlar qabul qilindi.
Ma'lumot uchun: Xalqaro ekspertlar tomonidan vazirlikning 76 ta normativ-huquqiy va ichki idoraviy hujjatlari o'rganildi, korruptsiya xavfi yuqori bo'lgan 8 ta yo'nalish tahlil qilindi. Vazirlik faoliyatida 209 ta korruptsiya xavfi aniqlanib, ularni bartaraf etishga qaratilgan choralar ko'rilmoqda.
Vazirlik va uning quyi tuzilmalarida korruptsiya va uni keltirib chiqaruvchi omillarni bartaraf etish hamda manfaatlar to'qnashuviga yo'l qo'ymaslik yuzasidan qabul qilingan me'yoriy hujjatlarning mazmun-mohiyatini vazirlik tizimidagi xodimlarga tushuntirish maqsadida 2021- yil 26-27-oktyabr` kunlari BMT Taraqqiyot dasturining etakchi ekspertlari hamda KPMG xalqaro auditorlik kompaniyasining vakillari ishtirokida seminar-trening tashkil qilindi.
Tizimda xodimlar bilan tuzilgan mehnat shartnomalarida korruptsiyaga qarshi kurashish va uning oldini olish bo'yicha majburiyatlar belgilandi.
Talabalar bilimini baholash tartibi o'zgartirildi. Oliy ta'lim muassasalari bitiruvchilarining yakuniy davlat attestatsiyasi to'g'risidagi nizomga o'zgartirishlar kiritildi.
Unga ko'ra, OTM bitiruvchilarining yakuniy davlat attestatsiyasini o'tkazishda oliy ta'lim muassasasi rektori tomonidan diplom loyihasi yoki bitiruv malakaviy ish (magistrlik dissertatsiyasi) himoyasi yoki ixtisoslik fanlaridan yakuniy davlat attestatsiya sinovini o'tkazish bo'yicha yakuniy davlat attestatsiyasi komissiyalari tarkibini shakllantirish tartibi joriy etildi.
Telegram ijtimoiy tarmog'ida @vazirga_takliflar_bot va “Anticoredu” boti faoliyati yo'lga qo'yildi. Vazir va uning o'rinbosarlariga bevosita ijtimoiy tarmoqlar orqali murojaat yo'llash imkoniyati yaratildi. Bugungi kunga qadar mazkur botga 116ta murojaat va takliflar kelib tushgan. Murojaatlar o'rnatilgan tartibda ko'rib chiqildi. Ko'rib chiqish jarayonida 25ta murojaatda oliy ta'limda korruptsiyaviy holatlar mavjudligi to'g'risida xabarlar kelib tushgan. Mazkur xabarlar o'rnatilgan tartibda mas'ullarni jalb qilingan holda o'rganildi, o'rganish natijalari bo'yicha zaruriy choralar ko'rildi.
