Zhifei Longcom kompaniyasining vaksinasini Oʻzbekistonda klinik tadqiqotlarini oʻtkazishga tanlangani sabablari eng yuqori xavfsizlik profiliga ega rekombinant vaksina boʻlganligi hamda birinchi va ikkinchi klinik sinovlarning natijalariga koʻra nojoʻya taʼsiri kamligi (0,3-0,5%dan kam)dir. Bundan tashqari, T-xotira hujayralarining hosil boʻlishi yuqoriligi, Non-neytrallovchi va neytrallovchi antitanalar oʻrtasidagi muvozanat mavjudligi kabi ilmiy koʻrsatkichlar ham bu tanlovimizning sabablari deb keltirishimiz mumkin.
Ushbu vaksina COVID-19 virusi glikoproteinining retseptorga bogʻlanuvchi domenini CHO rekombinant hujayralari yordamida koʻpaytirilib, tozalanib va alyuminiy gidroksidi qoʻshish orqali tayyorlangan. Noyabr oyidan boshlab Zhifei Longcom Biopharmaceutical Co.Ltd kompaniyasining 8 ta xodimi Oʻzbekistonga yetib kelgan va hozirgi kunga qadar Ilgʻor texnologiyalar markazinining 30 nafar olimlari, virusologiya instituti va boshqa tibbiyot muassasalarining 112 nafar tibbiyot xodimlari bilan birgalikda tadqiqotlarni oʻtqazishmoqda. Uchinchi bosqich klinik sinovlari 7000 ming koʻngillilar qatnashmoqda.
Tadqikotlarda har bir koʻngilli ishtirokchi 28 kun oraligʻi bilan 3 ta dozada “vaksina/platsebo” sxemasida emlandi. Bugunga kelib Oʻzbekistonda Xitoyning koronavirusga qarshi ZF 2001 vaksina sinovida ishtirok etish uchun umumiy tashrif buyurganlar - 14326 nafarni tashkil etdi. Ulardan 6829 nafar koʻngilli vaksinaning 1-dozasi, 2862 nafar koʻngilli vaksinaning 2-dozasi va 25 nafar koʻngilli 3-doza bilan emlandi.
Vaksinaning xavfsizligini tizimli kuzatish har bir emlashdan keyin 0-7 kun davomida amalga oshirildi. Koʻngillilar tomonidan faol hisobot shaklida va tadqiqotchilar tomonidan har bir emlashdan keyin 8-30 kun davomida muntazam kuzatuvlar oʻtkazilib, nojoʻya taʼsirlar toʻgʻrisida maʼlumotlar yigʻildi. 3-darajadagi nojoʻya taʼsirlar kuzatilmagan va ushbu vaksinadan foydalanish bilan bogʻliq jiddiy nojoʻya taʼsirlar aniqlanmagan.
Shu kungacha vaksina qabul qilgan koʻngillilarning hech birida oʻta nojoʻya salbiy taʼsir kuzatilmadi, faqatgina 5 kishida bir necha kundan soʻng bartaraf boʻlgan allergik reaksiya qayd etildi.
Hozirgi kungacha oʻtqazilgan tadqiqotlar immunizatsiya qilinganidan keyin SARS-CoV-2 virusiga qarshi neytrallovchi antitanalarning mikropatogenez usuli orqali aniqlanganda kamida 4 barobar oʻsishi aniqlandi. SARS-CoV-2 virusi RBD oqsili bilan bogʻlanuvchi antitanalarning immunoferment analizi orqali aniqlanganda titri kamida 11-marta oshganligi aniqlandi.
Oʻzbekistonlik olimlar ushbu vaksinani tadqiqotlarida faol qatnashganligini inobatga olib Xitoylik hamkorlar tomonidan bizni mamlakatimiz vaksina yaratuvchi sifatida tan olindi va uning nomi ZF-UZvac-2021 deb nomlandi. Vaksina yaratilishida hamkor tomon sifatida Oʻzbekistonga vaksina imtiyozli narxlarda va yetarli quvvatlarda yetkazib beriladi. Shuningdek, “Zhifei Longcom Biopharmaceutical Co.,Ltd” kompaniyasi vaksinasini Oʻzbekistonda mahalliylashtirish boʻyicha ishlarni Innovatsion rivojlanish vazirligi huzuridagi Ilgʻor texnologiyalar markazi bilan hamkorlikda amalga oshirish boʻyicha muzokaralar olib borilmoqda.
