Tadqiqotga koʻra, zoʻravonlikka uchragan ayollarning har beshidan biri (20%) oʻz joniga qasd qilish haqida oʻylagan.
Hududlar kesimida koʻrsatkichlar oʻta tafovutga ega: Andijon viloyatida – 33,3%, Navoiyda esa – 6% ayol oʻziga zarar yetkazish fikrini bildirgan. Mutaxassislar bu tafovutni turli hududlarda psixologik qoʻllab-quvvatlash va ijtimoiy yordamning farqli darajada boʻlishi bilan izohlaydi.
Soʻrov natijalari stressni yengish strategiyalariga doir qiziqarli tendensiyalarni ham ochib berdi:
- Jismoniy faollik va uy yumushlariga berilish — 29,2%
- Yolgʻiz qolish orqali yengishga urinish — 23,9%
- Hissiy portlash bilan boʻshanish — 22,5%
- Yaqinlar bilan suhbatlashish — 11,1%
Bundan tashqari, respondentlarning 6,7 foizi stress holatidan chiqishda umuman qiynalishini aytgan. Mutaxassislar bu koʻrsatkich ayollar uchun psixologik xizmatlar, maslahat markazlari va ijtimoiy yordam tizimini kuchaytirish zarurligidan dalolat berishini taʼkidlamoqda.
