Jamiyat, atrof-muhit inson oldiga tegishli vazifa, maqsad qoʻyadi, yuz berayotgan jarayonlardan xulosa chiqarishga undaydi. Yaʼni inson va jamiyat chambarchas bogʻliq. Oʻzbekiston xalq yozuvchisi Isajon SULTON bilan suhbatimiz yurtimizdagi islohotlar va ularning aholi tafakkuri, orzu-umidlari, qarashlariga taʼsiri haqida boʻldi.

* * *

— Odatda muayyan mamlakat yoki hudud­ning taraqqiyoti haqida soʻz yuritilganda iqtisodiy oʻsish, sanoatlashtirish va yangi texnologiyalarni tatbiq etish, ishlash va yashash uchun qulay va xavfsiz muhit yara­tish, shuningdek, aholiga sifatli tibbiy yordam koʻrsatish, taʼlim kabi jihatlarga koʻproq urgʻu beriladi. Bu toʻgʻri, albatta. Ayni paytda taraqqiyot mamlakatdagi ish­lab chiqarish darajasi, yangi texnologiya­larning xalq xoʻjaligi sohalariga qancha­lik tatbiq etilgani kabilar bilangina oʻlchanmaydi. Aholining maʼnaviy qarash­lari, islohotlarga munosabati, ularda ishtirok etish darajasi orqali ham na­moyon boʻladi. Keling, bugun yurtimizda roʻy berayotgan oʻzgarishlar, bugunimiz va kela­jagimiz haqida fikrlashsak...

— Bu xayrli jarayonlar haqida oʻylamay­digan odam boʻlmasa kerak. Hech bir mubolagʻa­siz aytish mumkinki, har biri yillarga teng kunlarda yashayapmiz. “Milliy tiklanish­dan — milliy yuksalish sari” gʻoyasi ostida mamlakat ravnaq topishi bilan bir qatorda asriy anʼanalarimizga mos ravishda oʻta mu­him qadriyat — inson qadri borasida eng yuksak minbarlarda yangragan tashabbuslar yurtdoshlarimiz uchun ham, boshqa oʻlkalar aholisi uchun ham birdek taalluqli. Oddiy qilib aytsak, yangi davrda Oʻzbekistonning har bir tashabbusi insonlarni yaxshilik va ezgulikka chorlab turibdi. Bu har bir oʻzbek qalbida faxr va gʻurur uygʻotishi shubhasiz. Inson qadrining yuksalishi oʻz-oʻzidan mil­liy oʻzlikning yuksalishini ifoda etadi.

— Vatanimizdagi izchil islohotlarni nomma-nom sanash mushkul. Ularni koʻ­rib, his etib turibmiz. Ayni paytda shu ijtimoiy-siyosiy, iqtisodiy, madaniy islohotlar jarayonida insonlar ongi va tafakkuri ham oʻzgarib boryapti deb bema­lol aytish mumkin. Aholining kechagi va bugungi orzu-umidlari oʻrtasidagi oʻzga­rishlarni qanday izohlay olasiz?

— Islohotlar mamlakat yuksalsin, aholi farovonligi oshsin, xalq oʻz yurtini yanada sevib, koʻz qorachigʻiday ardoqlasin degan ulugʻ niyat bilan boʻlyapti. Rivojlangan dav­latlarda xalq bunyod etgan turmush tarziga shohid boʻlgan yurtdoshlarimiz bu haqida ke­chagina hayratlanib soʻzlardi. Bugun shunday farovonlik yurtimizda vujudga kelmoqda. Yaqin-yaqingacha vatandoshlarimizning imko­niyati tor, orzu-havasi turmushi kabi oddiy edi: “Imorat qurib toʻylar qilsam, oʻgʻil- qizlarimni joylasam, Xudo bersa, munday­roq biron avtomashina olsam, bir oʻzbekka shu yetadi”, der edik. Bugun orzular oʻzgardi: koʻpchilik oilalarda bir emas, bir nechtadan avtoulov bor va ular endi hasham uchun emas, oilaga xizmat qilish uchun gʻizillab yurib­di. “Farzandimni uyli-joyli qilib olsam, vazifamni oʻtagan boʻlaman, qolganini Xudo berar” degan gaplar ham oʻtmishda qoldi. Bugun ota-onalar “Najot bilimdadir” de­gan hikmatning maʼnosini yaxshi anglaydi, millionlab yoshlar turli soha boʻyicha bilim olishga intilmoqda.

Qaysi birini aytaylik? Taʼlimdan ishlab chiqarishgacha, xalqaro siyosatdan tibbiyotgacha, ijtimoiy himoyadan davlat xizmatlarigacha, transport va logistikadan tadbirkorlikka­cha — barcha sohalarda tub oʻzgarishlar sodir boʻldi va davom etyapti! Elga xizmat qilayotgan yuzlab korxonalar, tadbirkorlik shoxobcha­lari kecha barmoq bilan sanarli emasmidi? Zamonaviy ulkan komplekslar qad koʻtarar ekan, aholi ham gʻayrat bilan tadbirkorlikka kirishib ketganini ayting. Yangi jarayonlar yurtdoshlarimizda intilish hissini uygʻotib yubordi, yaʼni hayotga munosabat oʻzgardi. Yal- yal yonib turgan peshlavhalar, doʻkonlarning shaklu shamoyili, undagi xizmatchilarning muomalasi, insonlarni qiziqtiradigan mah­sulotlarning bari yangilik. Ranglar tanlovi ham boshqacha — avvallari oddiy tuslar tan­langan boʻlsa, hozir chorlovchi, daʼvat etuvchi, kishi eʼtiborini tortuvchi ranglar ustun. Avvallari odamlar oddiy usulda kamtarona uylar qurardi, kamdan-kam kishilargina ikki qavatli imorat tiklardi. Endi oddiy kishi­lar ham ikki-uch qavatli, keng va shinam uy­lar quradigan boʻldi. Inshootlarning shaklu shamoyili ham yangilanib, qulay yechimlar urf boʻldi. Oldinlari shaharning baland uylari toʻqqiz qavatli boʻlardi, butun shahar boʻylab bir nechtagina oʻn olti qavatli imorat bor edi. Bugun qirq-ellik qavatli binolar qad koʻtar­gan.

Koʻpchilikning boylik tushunchasi va mu­nosabati ham oʻzgarmoqda. Ilgari ishlab topilgan mablagʻlar oddiy hashamlar uchun sarflangan boʻlsa, bugun elga xizmat tufay­li obroʻ-eʼtibor qozonish, katta maqsadlarga yoʻnalish birinchi oʻringa chiqyapti. Kishilar tadbirkorlikning yangi turlariga dadil ki­rib bormoqda. Boshqacha aytganda, islohotlar ularning ishbilarmonlik qobiliyatini roʻyob­ga chiqardi. Yangi mexanizmlar ishga tushdi. Avvaliga oddiy xizmat shoxobchalari, doʻkon­chalar ochilgan boʻlsa, raqobat kuchaygani sayin ishlab chiqarishning yangi va xususiy turla­riga ragʻbat ortdi. Zamonaviy tadbirkorlik zamonaviy bilimlarni talab qila boshladi. Yoshlarning bilim olishga, tajriba ortti­rishga intilishi kuchaygan deb bejiz aytib oʻtmadik. Chunki raqobat ortgani sayin yangi bilimlarga ehtiyoj paydo boʻldi. Bu jarayon allaqachon boshlanib ulgurdi, tadbirkorlari­miz anʼanaviy oldi-sotdi yoki oddiy baqqol­lik ish bermasligini allaqachon anglab yetgan.

Shiddat bilan elektron bozor rivoj­landi, ajablanarli joyi ham shunda: yaqin- yaqingacha sotuvchi va xaridor bir joyda uchrashadigan va naqd pul muomalasiga asos­langan bittagina bozor bor edi, hozir oʻnlab yangi bozorlar paydo boʻldi. Yurt yuksalishi uchun ulkan yangiliklar muttasil davom et­moqda: milliard dollarlik emas, milliard mijozlik xalqaro bozorlarga dadil kirib borildi. Davlatimiz rahbarining AQSH­ga tashrifi “oʻzbek xalqining aql mashʼa­li” yoritgan ummon orti mamlakatini jalb qilib, eng zamonaviy sohalarda tarixiy shartnomalarga erishildi. Shartnomalar hajmiga qarasak, ikki tomonlama manfaat­larga asoslangan bu munosabatlarda yurti­mizga eng soʻnggi texnologiyalar bilan birga ilgʻor bilim va malaka kirib kelishini koʻr­satib turibdi.

Sodda qilib aytsak, ishlab chiqarish yangiliklari oʻzimizniki boʻladi, infratu­zilma va xizmat sohasi rivojlanadi, un­cha-muncha mamlakat ega chiqolmaydigan noyob mutaxassislar yetishib chiqadi. Xomashyodan bir necha oʻn karra qimmat turadigan tayyor va yarim tayyor mahsulot eksporti kengayadi. Shu­ningdek, moddiy mahsulotlardan tashqari, aqliy-intellektual mahsullar sotiladigan chek-chegarasiz bozorlarga ham kirib boril­di. Tan olish kerak, atigi bir necha yil avval bu voqeliklar xayolda ham yoʻq edi.

Mamlakatda kishilar orzu-istakla­rini mamlakat taraqqiyotiga yoʻnalti­rishday ulkan jarayon roʻy berib ulgurdi. Misol uchun: ota-ona farzandining ilgʻor bilimlarni egallashini istaydi, davlat esa u farzandni yetakchi taʼlim dargohlari­ga yuboradi.

— Oliy oʻquv yurtlarida yaxshi mutaxas­sislarni tayyorlash uchun tegishli dars­liklar, zamonaviy jihozlangan, yetarli shart-sharoitga ega taʼlim inshootlari zarur. Shiddat bilan oʻzgarayotgan mehnat bozori talablariga mos keladigan dolzarb oʻquv dasturlari ham, albatta. Ammo kat­ta tajribaga ega mutaxassislar birinchi galda ham chuqur nazariy bilim, ham ama­liy tajribaga ega, ayni paytda oʻz mala­kasini toʻxtovsiz oshirib boradigan kuch­li pedagogik jamoa boʻlish kerakligini alohida taʼkidlab keladi.

— Bundan yuz yil avval Germaniyaga oʻqish­ga yuborilgan yoshlar haqidagi asar va huj­jatli film yodingizda boʻlsa kerak. Bugun har yili yuzlab shunday yoshlar jahonning eng nufuzli bilim dargohlarida bilim ol­moqda. Qolaversa, dunyodagi eng koʻzga koʻrin­gan olimlar, hatto Nobel mukofoti laureat­lari ham yurtimiz universitetlarida yoshla­rimizga maʼruza oʻqimoqda. Qarang: ota-ona istagi roʻyob topdi, shu bilan birga, mamlakat zamonaviy mutaxassislarga ega boʻldi. Bular­ning barchasi kelajak poydevorini yaratish yoʻlidagi hayotbaxsh jarayonlar. Birma-bir sanashning imkoni yoʻq, ammo har jabhada yuksalish roʻy berdi. Bizlar xursand boʻlib eʼtirof etayotgan bu ishlar hali boshlanishi demoqda tashabbus egalari.

Yaqinda ijtimoiy tarmoqlarda yetti tilni biladigan, oʻz ona tilidan tashqari inglizcha, ruscha, turkcha, ispancha, fransuzcha, xitoycha soʻzlasha oladigan oʻn besh yashar oʻsmir haqida xabarlar tarqaldi. Koʻrsangiz havas qilasiz: chin oʻzbekcha odob, kamtarlik, soflik bilan jilmayib turibdi. “Bir tilni bilgan — bir kishi, yetti tilni bilgan — yetti kishi” degan matal esga keladi. Farzandlarimiz qobiliya­tining roʻyobga chiqishi koʻplab tashabbuslar­ning hosilasi, albatta. Chunonchi, birgina oʻsha oʻsmir mamlakatda taʼlimga boʻlgan eʼ­tiborning natijalarini, turizm va tadbir­korlik imkoniyatlarining favqulodda ken­gayganini namoyon qilmoqda. Yangilanishlar kishilar turmushini qanday oʻzgartirayotgani­ga misol bu. Avvallari bunday yoshlar salkam noyob qobiliyat egasi deb eʼtirof qilinardi, bugun dunyo tillari bilan birga ilgʻor zamo­naviy fanlarni egallayotgan, turli fanlar, dasturlash, sunʼiy zako, ilgʻor texnologiyalar tilini biladigan yuzlab-minglab yoshlarimiz yetishib chiqdi.

Endi yangi Oʻzbekistonda vaqt tez va shid­datli, bir oz beparvo boʻlgan kishi orqada qolib ketadi. Bugun islohotlarga, oʻzgarish­larga ochiq boʻlishdan tashqari, bir qadam ilgʻor boʻlish haqida soʻz bormoqda. Bu juda katta koʻlamni qamrab oladi: hayot tarzimiz oʻzgarar ekan, bir-birimizga, davlatimiz­ga, qonunlarimizga, ish va xizmat sohasiga, taʼlimga, ishlab chiqarishga, xullas, barcha- barchasiga munosabatimiz ham yangi pogʻona­ga yuksalishi zarur. Kundalik hayotda bu — odamlar bir-birini izzatlashi, toʻgʻrilik, halollik, sobitlik, oʻzaro ishonch taraqqiy topishi tarzida namoyon boʻladi. Hech kim oʻz manfaatini yurti va vatandoshi manfaatidan ustun qoʻymasin, xalqini, mamlakatni sevib ardoqlasin — ana shunday bir jonu bir tan boʻlganimizda yuksak choʻqqilarni birgalashib zabt etamiz.

Shuncha kishining tushunchalarini kela­jakka moslash uchun odamga lovillab yonib turgan yurak, fidoyilik kerak, oʻzini elga fido qilishi kerak. Milliy yuksalishning negizi yuksak axloq va odob, insoniy fazi­latlarda ekanini hayotning oʻzi koʻrsatmoqda. Yurtimiz qoʻshni mamlakatlar, olis va yaqin davlatlar bilan chin oʻzbekcha anʼanalarga mos va xos, boshqalarni hurmatlagan va oʻzining izzatini bilgan tarzda munosabatlar qurdi. Balki endilikda aynan shu siyosat tufayli jahonda “davlatlararo yuksak axloq” de­gan tushuncha urf boʻlar? Bu goʻzal diyorda koʻp qirrali manfaatlarni koʻzda tutgan xalqaro anjumanlar boʻlib oʻtmagan kun yoʻqligiga barchamiz guvohmiz. Ular, avvalo, el-yurt man­faatlarini koʻzda tutgan holda hudud, min­taqa va dunyo taraqqiyotiga pogʻona boʻlmoqda. Kechagina ovozi hududidan nariga chiqmagan yurt chorlovlari bugun eng yuksak minbarlar­dan yangramoqda. Yoshlarni yetuk fazilatlar borasida birlashtirish, mintaqa va hududlar taraqqiyotining yangi bosqichlari, ilm-fan, madaniyat borasidagi hamkorliklar, qisqa­si, dunyo taraqqiyotiga aloqador oʻnlab xayrli yechimlar oʻrtaga tashlanmoqda.

— Ahli donish yaqin va uzoq kelajak aslida bugungi kunlardan, bugun amalga oshirayotgan xatti-harakatlardan boshla­nadi deb taʼkidlaydi. Kishilarimiz biz soʻz yuritayotgan islohotlarning bevosita ishtirokchisi, guvohi. Shu maʼnoda, ular­ning ertamiz haqidagi tasavvurlariga ham toʻxtalsak.

— Bugungi kunda kelajakka nekbin qara­shimiz judayam zarur. Chunki xalq bir, vatan bir. Shunday bir zamonda yashayapmizki, tengi yoʻq diyorimizni, har bir kishimizni izzatla­shimiz va ardoqlashimiz shart.

Yangilanishlar kishilarning davlatga mu­nosabatini ham oʻzgartirganini quvonch bilan eʼtirof etish lozim. Oʻtmishda xalq va davlat oʻrtasida jarlik bor edi. Davlat xalq xizma­tida boʻlsin degan tamoyil doirasida qilin­gan ishlar bu borada haqiqiy burilish boʻldi, buni kattayu kichik eʼtirof etadi.

Yurtimiz dunyoda tobora ulkan ahamiyat kasb etmoqda. Koʻplab sohalarda Oʻzbekiston ilgʻorlikka erishmoqda. Siyosatda, xayrli tashabbuslarda, ishlab chiqarishda, tijorat va tadbirkorlikda ustunmiz. Yangi karvon yoʻllari bunyod etilmoqda, yangi bozorlar ochilmoqda. Tez orada yurtimiz juda katta mablagʻ, bilim, texnologiya oqimlarining markazidan oʻrin olishi aniq boʻlib qoldi. Oʻzbekiston Sharq bilan Gʻarbni bogʻlovchi oʻta muhim koʻprikka aylanadi, buni bugun “xab” deb aytish urf boʻlgan. “Xab” — hamma im­koniyatlar, sharoitlar, maʼlumotlarni oʻzida jamlagan markaz boʻlsa, butun boshli mamla­katning xabga aylanishi misli koʻrilmagan imkoniyatdir. Shu sababli qonunlarimiz, tu­shuncha va tartiblarimiz, infratuzilmalar, logistika va transport, xizmat sohalari, boringki, jamiyatimiz yurtimizdan oʻtadi­gan shu katta oqimga tayyorlanib borilyapti. Oʻzingiz ayting, milliardlab mablagʻ va tex­nologiya oʻtadigan bu oqimdan xalq manfaati yoʻlida foydalanish uchun odamlarimiz qana­qa boʻlishi kerak?

Dunyo tobora raqamlashmoqda, yangi Oʻzbe­kiston uchun ilgʻor bilimli muhandislar, dasturchilar, qonunshunoslar, iqtisodchi­lar, qishloq xoʻjaligi ustalari kerak. Bu zamonaviy zavod-fabrikalar qurishdan koʻra ming marta murakkab ish. Chunki shunday mutaxassislar qatlami hosil boʻlsa, unday zavod-fabrikalarni xalqning oʻzi quradi. Oliy va kasbiy taʼlimga eʼtibor beril­ganining sababi shunda. Taʼlimdagi “sak­rash”ning mohiyati ham kelajakka yoʻnalgan, mamlakatni rivojlangan davlatlar qatorida koʻrishday ulugʻ va hayotbaxsh niyatning pilla­poyalari deb bilamiz.

Bir misol: Prezidentimizning “Kasbiy taʼlim tizimida boshqaruv samaradorligi­ni oshirish chora-tadbirlari toʻgʻrisida”gi farmoni mamlakatdagi maktabgacha va mak­tab taʼlimini oliy taʼlim dargohlariga uzviy bogʻlashi bilan birga, xalqona qilib aytganda, “ikkita qoʻli bor odamga uchinchi qoʻlni” taqdim qiladi. Yaʼni taʼlimning ta­komillashtirilishi, dual taʼlimning joriy qilinishi yoshlarimizning zamonaviy kasb- hunarga ega boʻlishini va pirovardida mala­kali mutaxassis kerak deb bong urayotgan ish beruvchiga “yetib borishini” taʼminlaydi. Bir necha yillik jarayonga nazar tashlasak, fanda katta yangilanishlar roʻy berganini, ilmiy darajaga ega boʻlgan yurtdoshlarimiz soni bir necha karra ortganini, tadqiqotlar koʻlami kengayganini, oliy taʼlimda yangi yoʻnalishlar barpo etilganini va xususiy soha shiddat bilan rivojlanganini, bu bo­rada qabul qilingan qarorlar mamlakatning eng ishongan kuchi boʻlmish yoshlarni maktab­dan oliy taʼlimga va xalq xoʻjaligiga olib oʻtuvchi koʻprik boʻlib xizmat qilishini tu­shunib olamiz. Barcha xayrli jihatlaridan tashqari, bu tashabbusda mamlakat yoshlarini kelajakka tayyorlash maqsadi bor.

— Fan-texnika, texnologiyada paydo boʻlgan yangiliklar odatda hayrat, qisman hadik, soʻng kuchli bahs-munozara, torti­shuvlar bilan qabul qilinadi. Shu maʼ­noda, koʻplab mamlakatlar nafaqat targʻib qilayotgan, shu bilan birga, keng foydala­nayotgan sunʼiy intellekt borasida nima­lar deya olasiz?

— Haqiqatan, yaqin kelajakda turmu­shimiz ilgʻor texnologiyalar tufayli katta oʻzgarishga uchrashi ayon. Ulugʻlarimiz “Hech bir inson qobiliyatsiz yaralmaydi” degan gapni koʻp aytardi. Aholining bilim va maʼlumotga boʻlgan ehtiyojini sunʼiy zako qondiradi, virtual voqelik esa real va virtual olam oʻrtasidagi chegarani tobora ozaytirib boradi. Bular texnologik qulay­liklar boʻlsa, masofaviy ish faoliyati keng urf boʻladi. Bugungi ofislar tubdan oʻz­garadi, binolar boshqa maqsadlarga yoʻna­ladi. Koʻplab sohalarda insonlar oʻrnini “aqlli” texnologiyalar egallaydi. Qiziq- da: bir paytlar insonlarning jismoniy mehnatini texnik qurilmalar bajara bosh­lagan, shu bilan jismoniy mehnat kam haq toʻlanadigan yumushga aylangan edi. Dunyo bir aylanib, endilikda bir qator aqliy yumushlarni ham elektron qurilmalar ba­jaradigan boʻldi. Vaziyatga tushkun qaray­digan kishi: “Axir qoʻlimizdagi ishimizni olib qoʻyyapti-ku” deb xavotir oladi. Nek­bin qaraydigan kishi esa mohiyatni darhol tushunib yetadi: bu jarayon hazrati inson­ning har qachongidan ham koʻra yuksakroq, sunʼiy va “aqlli” texnologiyalarning “qoʻ­lidan kelmaydigan” salohiyati — yangilik yaratish qobiliyatining roʻyobga chiqishi ha­qida bormoqda. Yaʼni bilim oling, tushuncha ufqlarini kengaytiring: yaratuvchanlik, za­monaviy ibora bilan aytganda, kreativlik qobiliyatingiz roʻyobga chiqishi zarur. Bu esa hazilakam qobiliyat emas va unga urfdagi­dan koʻra yuzlab baravar koʻp haq toʻlanadi. Boshqacha aytganda, taraqqiyotning oʻzi in­son qadrining yuksalishini va sharaflani­shini taqozo qilyapti. Yurtimizda esa ayni shu jihatga yuksak eʼtibor qaratilgani be­jiz emas.

— Odamlar farovon yashashiga xizmat qiladigan jamiki yangiliklar, texnik ixtirolar taraqqiyot belgilari sifa­tida baholanadi. Lekin inson uchun eng katta va oʻta muhim omil, eng katta boy­ligi xotirjamligi emasmi? Bunda bi­rinchi galda oʻlmas qadriyat boʻlgan tinch­lik, birdamlik, maʼnaviyat va maʼrifat­ni nazarda tutyapman.

— Davlatimizning ochiqlik siyosati tu­fayli hayotimizga kirib kelgan qulayliklar koʻp, ammo bularning barchasi turmushning axloq bilan, yaʼni oʻzligimiz bilan bogʻliq masalalarni qatʼiyat ila ilgʻorga olib chi­qishni taqozo qiladi. Maʼnaviyat boshqa so­halardan oʻn qadam oldinda yurishi, yangi kuch­ga, yangi harakatga aylanishi kerakligining ahamiyati shunda namoyon boʻladi.

Yuksak maʼnaviyat — yuksak insoniylik degani. Bir necha oʻn yil ilgarini koʻra olish uchun juda katta salohiyat va bilim zarur. Ulugʻ maqsadlar deyilganida koʻzlangan yuk­sak marralarga eltuvchi qudrat, eng avvalo, maʼnaviyat ekanligi qayta-qayta taʼkidlan­moqda.

Bugun kishilarimiz avvalgiday emas, emin-erkin. Imkoniyatlarini roʻyobga chiqara olishi uchun koʻplab sharoitlar yaratib beril­gan. Shu bilan birga, jahondagi oʻzgarishlar­dan xabardor, yangi bilim va texnologiyalarni diqqat bilan kuzatib borishmoqda. Modomi­ki, niyatlar ezgu, maqsadlar ulugʻ ekan, yurt yuksalishi yoʻlida har qachongidan ham koʻra jipslashishimiz, birlashishimiz judayam shart boʻlib turibdi. Duogoʻy ota-onamiz, qav­mu qarindoshimiz, bir tanu bir jon boʻlgan yaqinlarimiz, jigarlarimiz, butun xalqimiz birgalashib, yuksalish jarayonlarimizni qoʻl­lab-quvvatlashimiz zarur.

Hazrat Alisher Navoiy bobomizning ushbu misralari bugun uchun ham dolzarb boʻ­lib jaranglamoqda:

Tuxm yerga kirib, chechak boʻldi,

Qurt jondin kechib, ipak boʻldi.

Lola tuxmicha gʻayrating yoʻqmi?!

Pilla qurticha himmating yoʻqmi?!

Mamlakatimizda barq urayotgan yangi davr aynan gʻayrat-shijoat, himmat va muruvvat­ni, yangilikchi va yaratuvchan boʻlishni taqozo etayotgani ayon.

Buncha ishlarning juda muhim jihati bor bu — baraka! Yurtimizni bejiz barakotli deyishmaydi. Ayni shu yangilanishlar ham, niyatlarning amalga oshishi ham, boringki, xalqimizning oʻzi ham shu barakaning namoyon boʻlishi, desak yanglishmaymiz.

Bular — yurakdagi gaplar-da. Dunyo mut­tasil oʻzgarmoqda. Jahonning turli bur­chaklarida ziddiyatlar olovi susaygani yoʻq. Tavba, hazrat Odam Ato oʻgʻillaridan qolgan zoʻravonlik va kibr urushlari davom etib kelmoqda. Bizning yurtimiz, xalqimiz esa har doimo tinchlik-totuvlik tarafdori, shu talatoʻp makonda ezgu anʼanalariga sodiq holda yuksalish yoʻlini tutgan. Oʻzbekis­ton Prezidenti raisligida Ozarbayjon, Tojikiston, Turkmaniston, Qirgʻiziston va Qozogʻiston Prezidentlari ishtiroki­da oʻtgan Maslahat uchrashuvini barchamiz faxr va gʻurur bilan kuzatdik. Bu misli koʻrilmagan tashabbus nafaqat yurtimiz­ni, balki mintaqani yangi taraqqiyot yoʻ­liga boshlashini kafolatlaydi. Barcha bu yangilanishlarning tashabbuskori ona yurtimiz, vatanimiz ekanligi barchamizga gʻurur bagʻishlaydi. Har kuni oʻzgarayotgan dunyoda bu juda qatʼiy va muhim tashabbus. Oʻylab koʻrsangiz, qancha hikmat bor.

Davrimiz yangilanishlari yurtimiz tup­roqlarida yashab oʻtgan barcha ajdodlari­mizga savobi tegadigan, bugun yashayotgan va kelajakda dunyoga keladigan avlodlarning haqli eʼtirofiga sazovor boʻladigan goʻzal, farovon, taraqqiy etgan vatan barpo etish­day ulugʻ davr boʻlib tarixga muhrlanishiga shubha yoʻq.

“Yangi Oʻzbekiston” muxbiri

Rustam BOYTOʻRA suhbatlashdi.