“Qamchiq” dovonida qor koʻchkisi xavfi yuzaga kelganligi sababli, 9-fevral kuni soat 13:30 dan A-373 Xalqaro avtomobil yoʻli avtomobillar harakati uchun vaqtincha yopildi.

Shu sababli fuqarolarni dovondan evakuatsiya qilish shtabi tuzilib, Favqulodda vaziyatlar vazirligi “Oʻzbekiston temir yoʻllari” AJ hamkorligida fuqarolarga 902-sonli “Angren – Orzu – Pop” yoʻnalishida maxsus poyezd reysi tashkil etildi.

Bu haqda Oʻzbekiston Respublikasi Transport vazirligi Axborot xizmati xabar berdi.

Taʼkidlanishicha, bugun soat 18:00 da Ohangaron, Angren, Orzu temir yoʻl bekati va vokzallaridan Pop vokzaligacha yoʻlovchi poyezdda evakuatsiya qilindi.

Shuningdek, 901-sonli “Pop – Angren” yoʻnalishida ham fuqarolarni dovondan evakuatsiya qilish ishlari davom ettiriladi.