Qozogʻistonning Oqtau shahridagi “Oil City” koʻrgazma majmuasida “Made in Uzbekistan” yarmarkasi doirasida shou-rum, milliy koʻrgazmalar oʻtkazish uchun maydon hamda savdo ombori tashkil etildi. Bu haqda Savdo-sanoat palatasi axborot xizmati maʼlum qildi.
Mazkur shou-rum va savdo ombori Oqtau shahrining markazida joylashgan boʻlib, 1800 kv.m maydoni Oʻzbekiston Savdo-sanoat palatasi tomonidan ijaraga olingan.
«Shou-rumning asosiy maqsadi mamlakatimizning eksport salohiyatini namoyish etish, aholini arzon va sifatli mahsulotlar bilan taʼminlash, shuningdek, Oʻzbekiston va Qozogʻiston tadbirkorlari oʻrtasida yangi ishbilarmonlik aloqalarini oʻrnatishdan iborat.
Shou-rumning asosiy yoʻnalishlari quyidagilarni oʻz ichiga oladi: oziq-ovqat, toʻqimachilik, hunarmandchilik, charm, elektrotexnika va qurilish mahsulotlari.
Yil davomida mazkur shou-rumda respublika boʻyicha korxonalar tomonidan ishlab chiqarilayotgan milliy mahsulotlarni joylashtirish va sotish imkoniyati mavjud«, deyiladi xabarda.
