Navoiy viloyati Karmana tumanidagi “Doʻstlik” MFYda qad rostlayotgan “Yangi Oʻzbekiston” massivlaridagi bugungi oʻrganishlar natijasida ayrim uy-joylarning devor monolitlari notekis terilgani, qurilish maydoni hududi chiqindilardan tozalanmagani maʼlum boʻldi.

Bu 2022-yilning iyun oyidan qurilishi boshlangan, 420 ta xonadonli 18 ta uy-joylarga ega massivdagi normalarga amal qilmaslik bilan bogʻliq birinchi holat emas.

Soʻnggi 5 oyda qurilish sohasida hududiy nazorat inspeksiyasi tomonidan qurilish-montaj ishlarining sifatli bajarilishi boʻyicha olib borilgan tekshiruvlar natijasida uy-joylarning:

      • tashqi pardozlash ishlari sifatsiz bajarilganligi;
      • devor yuza qatlamlari notekis qilinganligi;
      • devor burchaklarida bir toʻgʻri chiziqlik taʼminlanmaganligi;
      • 11-sonli uyning poydevor armokarkaslari himoya qatlami 50 mm fiksatorlar bilan taʼminlanmasdan, amalda turli xil oʻlchamdagi tabiiy toshlardan foydalanilgan holda karkas oʻrnatish ishlari bajarilganligi aniqlangan.

Bu boʻyicha masʼul xodimlarga tegishli koʻrsatmalar berilib, ijrosi nazoratga olingan. Qurilish ishlari boshlangandan beri massivda 16-marta tekshiruvlar oʻtkazilgan boʻlsa, kamchiliklar oʻz vaqtida bartaraf etilmaganligi sababli inspeksiya tomonidan 3-marta MJtKning 99-moddasiga asosan maʼmuriy ish hujjatlari tayyorlanib, sudlarga oshirilgan.

Qurilish vazirligi masʼullaridan iborat tezkor guruhning nazorat safarlari respublikaning boshqa hududlarida ham davom etadi.