“Roma” klubi qishki transfer oynasida jamoa hujumchisi Eldor Shomurodov bilan xayrlashishni rejalashtirmoqda, deya yozadi Corriere dello Sport nashri.
Italiya A Seriyasi joriy mavsumida muvaffaqiyatsiz ishtirok etayotgan Rim klubi rahbariyati qishki transfer oynasida tarkibda bir qator oʻzgarishlarga qoʻl urmoqchi. Klub Eldor Shomurodovni transfer qilish yoki ijaraga berish variantini koʻrib chiqmoqchi.
Insayder Nikola Skiraning yozishicha, “Roma” qishki transfer oynasida jamoaning asosiy forvardi Artyom Dovbikga raqobat qila oladigan va uning oʻrnini bilintirmaydigan hujumchini taklif etmoqchi. Shuningdek, oʻng qanot himoyasini kuchaytirish uchun ham variantlarni izlashga tushgan.
Eslatib oʻtamiz, Eldor Shomurodov noyabr oyida Oʻzbekiston milliy jamoasi tarkibida Qatarga qarshi uchrashuvda jarohat olib, ikki haftaga safdan chiqqan va oʻtgan haftada “Atalanta”ga qarshi uchrashuvda (0:2) rimliklar safida zaxiradan maydonga tushgandi.
