Ushbu tarixiy kelishuv mamlakatlarimiz tarixida yangi sahifa ochib, “bir asrlik muammo“ga nuqta qoʻyadi hamda butun mintaqaning uzoq muddatli barqarorligi va ravnaqi uchun mustahkam poydevor yaratadi.
Oʻn yillar davomida chegara masalalarining hal etilmaganligi, ayniqsa, aholisi zich Fargʻona vodiysida keskinlik va nizolar manbai boʻlib keldi. Bu hududda uch mamlakat fuqarolari yonma-yon, baʼzan bir koʻchaning ikki tomonida yashashi odatiy hol. Tojikiston va Qirgʻiziston oʻrtasidagi chegara shartnomasi, shuningdek, bugungi uch tomonlama shartnomaning imzolanishi bu vaziyatni tubdan oʻzgartirib, yuzaga kelishi mumkin boʻlgan nizolar manbaini bartaraf etadi.
Endi chegaralar uzil-kesil belgilangach, mamlakatlarimiz uchun savdo-iqtisodiy, transport, madaniy-gumanitar va ekologik hamkorlikni kengaytirish uchun keng imkoniyatlar ochilmoqda. Buning misli koʻrilmagan iqtisodiy samarasi tez orada oʻzini namoyon etadi.
2017-2018-yillarda Oʻzbekiston–Qirgʻiziston davlat chegaralari toʻgʻrisidagi shartnoma, Oʻzbekiston, Qozogʻiston va Turkmaniston oʻrtasida davlat chegaralarining tutash nuqtasi toʻgʻrisidagi shartnoma, Oʻzbekiston va Tojikiston oʻrtasida chegara uchastkalari boʻyicha shartnoma imzolandi.
Bunday kelishuvlarga erishish Markaziy Osiyoning barcha davlatlari yetakchilarining kuchli siyosiy irodasi, pragmatik yondashuvi, hamkorlik va oʻzaro anglashuvga intilishi tufayli boʻldi.
Eng muhim natijalardan biri — bugungi kunda xalqaro hamjamiyat Markaziy Osiyoga umumiy oʻziga xoslikka va oʻzaro bogʻliq manfaatlarga ega yaxlit mintaqa sifatida qarashni boshladi.
Umuman olganda, yuqoridagi tarixiy yutuqlar hatto eng murakkab masalalarni ham ochiq muloqot, hurmat va oʻzaro ishonch orqali samarali hal etish mumkinligiga yorqin misoldir. Bugun Markaziy Osiyo butunlay yangi – jipslashgan va kuchli, dunyoga va keng koʻlamli sheriklik uchun ochiq mintaqadir. Bu, albatta, quvonarlidir, — deb yozadi Prezident matbuot kotibi Sherzod Asadov.
