Endi ana shu imkoniyatlar yanada kengayib, mahallaning iqtisodiy, ijtimoiy salohiyati oshirilmoqda. Sodda aytganda, barcha mahalla har bir jabha va yoʻnalishda yangi Oʻzbekistonga munosib qiyofa kasb etyapti. Mazkur ishlarda Prezidentimizning “Alohida tuman (shahar) va mahallalarni aholining yashashi va tadbirkorlik faoliyati bilan shugʻullanishi uchun namunali hududga aylantirish chora- tadbirlari toʻgʻrisida”gi qarori muhim dasturilamal boʻlib xizmat qilyapti.

Xususan, Fargʻona viloyati Rishton tumanidagi “Boʻston” mahalla fuqarolar yigʻiniga “Yangi Oʻzbekiston qiyofasidagi mahalla” maqomi berildi. Yangi loyi­ha qishloq meʼmoriy qiyofasi, odamlar hayot tarziga yangicha ruh, koʻtarinkilik olib kirdi. Tashabbus doirasida mahalla aholini shu joyning oʻzida ish bilan band boʻlishini taʼminlaydigan namunali maskanga aylantiriladi.

“Boʻston” mahalla fuqarolar yigʻini Far­gʻona — Qoʻqon katta avtomobil yoʻli yoqasida joylashgan. Olti mingdan ortiq aholi umr­guzaronlik qilayotgan mahallada yechimini kutayotgan masalalar bor. Hozirga qadar ma­hallaning mavjud infratuzilmasini yaxshi­lash bilan bogʻliq ehtiyojlar oʻrganilib, ij­timoiy-iqtisodiy rivojlantirish boʻyicha loyiha va dasturlar ishlab chiqildi.

Aholi va transport harakatlariga xa­laqit beradigan binolar, qoʻlbola savdo va xizmat koʻrsatish shoxobchalari oʻrniga zamo­naviy meʼmoriy yechimga ega bino-inshootlar qurilmoqda.

— Mahallamiz yangi Oʻzbekiston qiyofasi­dagi manzil sifatida tanlanib, 5 milliard soʻm ajratilmoqda. Shu orqali aholi band­ligi taʼminlanib, kambagʻallikdan chiqarish uchun shart-sharoitlar yaratiladi, — deydi “Boʻston” mahalla fuqarolar yigʻini raisi Saminjon Roʻziboyev. — Mahallada 40 ta mikroloyiha ishga tushiriladi. Xususan, kichik ishlab chiqarish tarmogʻi kengayadi, savdo va xizmat koʻrsatish koʻpayib, tu­rizm, tomorqachilik, chorvachilik ishla­ri jadallashadi. Natijada reestrdagi 23 ta oila kambagʻallikdan chiqarila­di. Zamonaviy poliklinika, yoshlar sport-sogʻlomlashtirish majmuala­ri quriladi. Markaziy koʻchalarga oʻrindiqlar oʻrnatilib, 4 kilometr yoʻl asfalt qilinadi. Fargʻona koʻ­chasining 2 kilometriga toʻsiqlar oʻrnatish, ariqlarga lotok yotqizish, yoʻl yoqasida yashil maydon yaratish ishlari bajarilmoqda. Isteʼmol yuqori boʻlgan 15 ta uy-joyga energiya tejovchi muqobil qurilmalar oʻrna­tilyapti. Mahalladagi ijtimoiy soha obyektlari DXSH asosida taʼmirlanib, zamonaviy isitish tizimlari quriladi.

Mahalla ahli tomorqasiga “Rishton agro logistik” MCHJ, “Sherakhun” xususiy korxonasi bilan hamkorlikda eksportbop gulkaram, qizil va oqkaram ekilib, keyin eskport qilinadi. Tadbirkorlik dasturi doirasida “Biznesga birinchi qadam”, “Oi­laviy tadbirkorlikni rivojlantirish” hamda “Kichik biznesni uzluksiz qoʻllab- quvvatlash” kompleks dasturlari asosida jami 850 million soʻm imtiyozli kreditlar ajratiladi.

Sanoat mahsulotlari ishlab chiqarish va xizmat koʻrsatish rivojlantiriladi. Xusu­san, “Boʻston mebellari” MCHJ tomonidan umumiy qiymati 2 milliard soʻm boʻlgan “Yogʻochga qayta ishlov berish” loyihasi start oladi. “Tillaboyev Zafarjon” oilaviy kor­xonasi tashabbusi bilan zamonaviy savdo va turizm tarmogʻi faoliyat boshlaydi.

— Uy sharoitida trikotaj ishlab chiqa­rish bilan shugʻullanib kelyapmiz, — deydi tadbirkor Hayitxon Nuriddinova. — “Yangi Oʻzbekiston qiyofasidagi mahalla” loyihasi doirasida ishimizni kengaytirishga joy ajratib berildi. Bu yerga 500 million soʻm sarmoya kiritmoqchimiz. Natijada 10 dan ziyod ish oʻrni yaratiladi.

“Yangi Oʻzbekiston qiyofasidagi mahal­la” konsepsiyasi doirasida qamrab olingan masalalar keng va rang-barang. Asosiy maq­sad — aholi farovonligini oshirish or­qali ularga munosib shart-sharoit yaratish. Bu ishlarda aholi tashabbuskorligi, ham­jihatligi ham ortib bormoqda. Xususan, Umidjon Rahimov savdo markazi qurish tashabbusi bilan chiqdi. Bahromjon Sharo­fiddinov esa oʻquv markazi tashkil etyapti.

— Prezidentimiz qarori asosida Boʻston va Zohidon mahallalarida “Yangi Oʻzbekiston qiyofasidagi mahalla” konsepsiyasi amalga oshirilmoqda, — deydi Rishton tumani ho­kimining birinchi oʻrinbosari Doniyor Rah­monqulov. — Hududlarni “taraqqiyot va yetak­chilik maskani”ga aylantirish loyihalari ishlab chiqildi.

Loyihada savdo, servis va kichik ishlab chiqarish obyektlari, boʻsh yer maydonlari, davlat mulki inshootlari, hunarmandlik, xizmat koʻrsatish va mikrosanoat markazla­rini tashkil etish imkoniyatlari hisobga olingan. Loyiha asosida nafaqat tanlangan mahallalar, balki ularga qoʻshni hududlar aholisi ham ish bilan taʼminlanib, tadbir­korlik kengayadi.

Bir soʻz bilan aytganda, bunday hayotbaxsh loyihalar natijasida hududlar har jihat­dan obod boʻlib, aholining tadbirkorlik sa­lohiyati oshmoqda, koʻplab ish oʻrinlari yara­tilib, zamonaviy va qulay xizmat koʻrsatish ishlari yangi bosqichga koʻtarilmoqda.

Surxondaryo viloyatida “Taraqqiyot va yetakchilik maskani” dasturi doirasida 30 ta mahalla “Yangi Oʻzbekiston qiyofasida­gi mahalla” sifatida tanlab olingan. Loyi­ha doirasida har bir mahallaga 5 milliard soʻmdan mablagʻ ajratish belgilangan.

Termiz tumanida “Yangi Oʻzbekiston qiyofa­sidagi mahalla” loyihasi uchun 2 ta — Qoʻngʻi­rot va Qahramon mahallalari tanlab olingan. Xususan, Qahramon mahallasida keng koʻlamli obodonlashtirish va infratuzilmani yangi­lash jadal surʼatda davom etayotir. Hududdagi 5,4 kilometr yoʻl taʼmirlandi. Endi 1 kilo­metr ichimlik suv quvuri yangilanadi. Ikkita zamonaviy transformator, 50 ta beton ustun oʻrnatilmoqda. Muhimi, loyiha doirasida 20 ga yaqin tadbirkorlik tashabbusi amalga oshirilib, 70 ta yangi ish oʻrni yaratish koʻzda tutilgan. Bu esa Qahramon mahallasida ish­sizlikni keskin kamaytirib, aholi turmush darajasini yaxshilaydi.

Sherobod tumanining qariyb 6 ming aho­li yashaydigan Dehqonariq mahallasi dav­lat ahamiyatidagi yoʻl boʻyida joylashgan. Hozir u Novbir, Hakimobod va Gulchinor mahallalari uchun ham markaz vazifasini oʻtaydi.

Ushbu hududga ham “Yangi Oʻzbekiston qiyo­fasidagi mahalla” maqomi berilib, infra­tuzilma yaxshilanib, tadbirkorlik rivoj to­padi. Aholi bandligi taʼminlanadi.

Loyiha doirasida mahallada maktab­gacha taʼlim tashkiloti binosi, dam olish maskanlari, bolalar va sport maydonchala­ri, piyodalar hamda salomatlik yoʻlakchala­ri barpo etiladi. Hozir bu borada ishlar boshlangan. Shuningdek, yaqin kelajakda mahalla hududida kichik bozor, savdo va xizmat koʻrsatish shoxobchalari, hunar­mandlik ustaxonalari ochish rejalashti­rilgan.

— Bir-birini toʻldirgan dasturlar, lo­yihalar sabab koʻz oʻngimizda mahallamiz obod boʻlib boryapti. Har kunimiz yangi bir tashabbus bilan boshlanmoqda, — deydi “Dehqonariq” mahalla fuqarolar yigʻini raisi Ulfat Bozorov.

Shu kunlarda Dehqonariqda 10 kilometr ichki yoʻl asfaltlanmoqda, 3,5 kilometr elektr tarmogʻi tortilmoqda. Yaqin vaqt ichi­da ichimlik va sugʻorish suv taʼminotini yax­shilash uchun 2 ta nasos hamda 3 ta zamonaviy transformator punkti oʻrnatilishi koʻzda tutilgan.

— Mahallamizda yoʻl deysizmi, maktab yoki bogʻchami, poliklinika, elektr, suv, gaz dey­sizmi, hammasida oʻzgarish qilish uchun bir­dek harakat ketyapti. Turli tashkilotlar va­killari bugun jips boʻlib ishlayapti. Bundan kim ruhlanadi, albatta, shu yerdagi odamlar- da! Darvozadan hatlashimiz bilan obodlikka duch kelib, shukrona qilyapmiz. Kayfiyatimiz togʻdek koʻtarilib, hashar va obodonlashtirish ishlarida faol ishtirok etyapmiz, — deydi mehnat faxriysi Abdulhamid Ziyodullayev.

Qisqa vaqt ichida Dehqonariq mahallasi­ga ham shahar muhiti kirib boradi, u kamba­gʻallik va ishsizlikdan xoli, obod va namuna­li maskanga aylanadi.

— Endi hududlarimizda tadbirkorlik yanada rivojlanadi. Taʼlim va ijtimoiy soha uchun keng sharoit yaratiladi. Viloyatda­gi “Yangi Oʻzbekiston qiyofasidagi mahalla” sifatida belgilangan hududlardagi ishlar­ni tajriba va seminarlar bahonasida ham borib, kuzatib kelyapmiz. Ishlar qizgʻin. Har bir mahalla oʻz salohiyati, tashabbuskorligi va birdamligi bilan oʻziga xos taraqqiyot yoʻliga qadam qoʻymoqda, — deydi Denov tu­manidagi “Bogʻi Eram” MFY raisi Jasur Turdiyev. — “Yangi Oʻzbekiston qiyofasidagi mahalla” gʻoyasi faqat yoʻl yoki infratuzilma yangilanishi bilan cheklanib qolmaydi. Ma­salan, bizning mahalla katta yoʻl yoqasida joylashmagan. Rivojlanish esa shaharlarda­gidan qolishmaydi.

Qiziriq tumanidagi Takiya va Kunchiqish mahallalarida ham “Yangi Oʻzbekiston qiyo­fasidagi mahalla” konsepsiyalari joriy etilmoqda. Xususan, besh mingdan ortiq aho­li yashaydigan Kunchiqish mahallasida loyi­ha asosidagi ishlar bosqichma-bosqich davom etmoqda.

— Keyingi yillardagi tashabbuslar sa­bab mahallalar faqatgina maʼmuriy tuzil­ma emas, balki hudud aholisini ijtimoiy qoʻllab-quvvatlaydigan, odamlar muammo­sini joyida hal etishga qodir, bandlikni taʼminlash va bunyodkorlik ishlari amal­ga oshirilayotgan muhim manzilga aylan­moqda. Bunday katta bunyodkorlik ishlari mamlakatimizda inson qadrini ulugʻlashga qaratilgan islohotlarning amaliy nati­jasidir, — deydi Kunchiqish mahallasi raisi Shokir Jumayev.

Joriy yilning Mahallani rivojlantirish va jamiyatni yuksaltirish yili deb nomlanishi ham tizimdagi ishlar yangi bosqichga koʻtarilishiga zamin yaratmoqda. Shu bois, mahalla asliyatiga qaytib, odamlarni birlashtirgan, ularning hayoti, orzu- umidlari, quvonch va tashvishlarini oʻzida mujassam etgan muqaddas maskanga aylanib boryapti.

Rasuljon KAMOLOV,

Sarvar TOʻRAYEV,

“Yangi Oʻzbekiston” muxbirlari