2026-жыл 28-сентябрьде зонд Ҳинд океаны үстинен шама менен 8640 километр бийикликтен өтти. Жердиң тартысыў күши оның қозғалыс бағытын шама менен 20° қа өзгертти ҳәм тезлигин шама менен 3,5 км/с - шама менен 12 600 км/саатқа арттырды, деп хабар берди “science.ru”.
Манёвр дерлик өз жанылғысын жумсамай аппарат траекториясын сезилерли дәрежеде өзгертиў имканиятын береди. Юпитерге тиккелей ушыўдың орнына, “JUICE” кем-кемнен зәрүр тезликти арттырыў ҳәм газ гиганты системасына сәйкес траекторияға шығыў ушын планеталардың тартысыў күшинен пайдаланады.
Европа космос агентлигиниң анық есап-санақларына бола, минимал бийиклик шама менен 8641 километрди қурады. Бул ўақытта аппарат Ҳинд океаны үстинде еди. Манёвр жүдә анық навигацияны талап етти. Ушыўдан төрт ҳәпте алдын қәнигелер бағдарды дүзетиў ушын алты имканиятты көрип шықты, бирақ тек ғана бир киши дүзетиў керек еди. “JUICE” траекториясын күшейтилген бақлаў 17-августта басланған ҳәм 10-октябрьге шекем даўам етеди. Жанылғыны үнемлеў “JUICE” ушын айрықша әҳмийетке ийе.
Юпитерге жетип келгеннен соң, аппарат орбитасын бир неше рет өзгертиўи ҳәм оның ең ири муз жолдаслары менен онлаған жақынласыўларды әмелге асырыўы керек болады. Планеталар аралық ушыў ўақтында қанша аз жанылғы сарыпланса, Юпитерде илимий бағдарлама ушын сонша көп жанылғы қалады. Ушыў аппараттың он илимий әсбабын тексериў ушын да пайдаланылған. Жер ҳәм Ай жақсы үйренилген объектлер болып хызмет етеди, сонлықтан бақлаўлар қәнигелерге тийкарғы миссия басланыўынан алдын әсбапларды сазлаў ҳәм мағлыўматларды қайта ислеў усылларын тексериў имканиятын береди.
Жақынласыў ўақтында “JUICE” Жер ҳәм Айдың сүўретлерин алды. Сүўретлерде Африка ҳәм Мадагаскар көринеди. “JANUS” илимий камерасы да сүўретке алыў жумысларын алып барған, бирақ оның жоқары анықлықтағы сүўретлерин Европа космос агентлиги мағлыўматларды қабыл етип, қайта ислегеннен соң жәриялаўды режелестирмекте.
Соның менен бирге, Европа-Қытай “SMILE” миссиясы Жерге жақынырақ өлшеў жумысларын алып барды ҳәм поляр жақтысын бақлады. Еки аппарат мағлыўматларын салыстырыў илимпазларға магнит қуйрығының алыс бөлиминдеги процесслерди планетаға әдеўир жақын жерде жүз берип атырған қубылыслар менен байланыстырыў имканиятын береди. Бул 2023-жылдың апрель айында иске қосылғанынан берли “JUICE” тиң үшинши ири гравитациялық манёври болып табылады.
2024-жыл август айында аппарат космонавтика тарийхында биринши мәрте Ай ҳәм Жер жанында избе-из гравитациялық маневрди әмелге асырды, 2025-жыл август айында болса Венера жанынан өтти. 2029-жылы январь айында “JUICE” және Жерге қайтып келеди. Ҳәзирги траекторияға бола, қурылма планета бетиниң үстинен шама менен 4635 километр аралықтан өтеди. Жердиң бул соңғы гравитациялық манёвры оны тиккелей Юпитерге бағытлаўы керек.
Юпитерге жетип барыў 2031-жыл июль айына режелестирилген. Буннан кейин, “JUICE” планетаның өзин ҳәм оның үш ири муз жолдасы - Европа, Каллисто ҳәм Ганимедти изертлейди. Улыўма етип айтқанда, жасалма жолдаслардың 35 жақын пәрўазы режелестирилген ҳәм 2034-жылы аппарат Ганимед орбитасына шығыўы керек.
Миссияның тийкарғы илимий ўазыйпасы Юпитердиң музлық дүньясы ҳәм оның астындағы океанлардың қәсийетлерин анықлаў, сондай-ақ, бундай объектлер тиришилик ушын потенциал түрде жарамлы болыўы мүмкин болған шараятларды баҳалаўдан ибарат. 28-сентябрь күни Жердиң табыслы ушыўы “JUICE” тиң Юпитер системасына сегиз жыллық ушыўының гезектеги басқышы болды. Кейинги тийкарғы гравитациялық манёвр 2029-жылдың январь айында Жерде болып өтеди.
