Ўзбекистон фахрийларининг ижтимоий фаолиятини қўллаб-қувватлаш «Нуроний» жамғармаси Васийлик кенгаши «Меҳнат фахрийси» кўкрак нишони билан тақдирлаш тўғрисида қарор қабул қилди.
Қарор Ўзбекистон Республикаси Президентининг 2016 йил 28 декабрдаги ПФ–4906-сон Фармони ҳамда 2017 йил 14 июлдаги ПҚ–3133-сон қарори ижросини таъминлаш мақсадида қабул қилинган.
Ҳужжатга кўра, иқтисодиёт, ишлаб чиқариш, илм-фан, маданият, таълим, соғлиқни сақлаш, юриспруденция ва бошқа соҳаларда кўп йиллар ҳалол ва самарали меҳнат қилган, шунингдек, оила мустаҳкамлиги, ёш авлод тарбияси ва миллий ҳамда умуминсоний қадриятларни тарғиб этишга муносиб ҳисса қўшган бир гуруҳ юртдошлар «Меҳнат фахрийси» кўкрак нишони билан тақдирланади.
Қарорда тақдирлаш маросимини тантанали тарзда ташкил этиш, унда давлат ва жамоат ташкилотлари раҳбарлари иштирокини таъминлаш, шунингдек, тадбирни оммавий ахборот воситаларида кенг ёритиш бўйича масъул идораларга тегишли вазифалар юклатилган.
Шунингдек, «Нуроний» газетасининг махсус сонида «Меҳнат фахрийси — 2026» кўкрак нишони билан тақдирланганларнинг тўлиқ рўйхатини эълон қилиш, қарор матнини эса қатор республика нашрларининг электрон платформаларида чоп этиш тавсия этилган.
Мазкур қарор ижросини назорат қилиш «Нуроний» жамғармаси республика бошқаруви раиси зиммасига юклатилган.
“Меҳнат фахрийси” кўкрак нишони билан тақдирланган барча ватандошларимизни чин дилдан қутлаймиз!
