Bu Prezidentning 175-son Farmoni bilan, jinoyat protsessida fuqarolar va tadbirkorlarning huquqlarini himoya qilishga qaratilgan yangi mexanizmlar taklif etilmoqda.
Unga koʻra, davlat organlari tomonidan garovga qoʻyilgan mablagʻlarni qaytarish muddati kechiktirilgan taqdirda, garov summasi taqdim etilgan idoradan har bir kechiktirilgan kun uchun Markaziy bankning asosiy stavkasi miqdorida foiz undiriladi.
Masalan, jinoyat ishi doirasida tadbirkordan garov puli olingan va keyinchalik sud ushbu mablagʻni qaytarish haqida qaror qabul qilgan boʻlsa, qarorni ijro etishni choʻzib yurish mumkin boʻlmaydi. Sudning garov pulini qaytarish haqidagi qarori darhol ijro etilishi kerak.
Yangi tartib davlat organlarining garov mablagʻlarini oʻz vaqtida qaytarish boʻyicha masʼuliyatini kuchaytiradi.
Farmonda jinoyat ishi doirasida reabilitatsiya qilingan yoki oqlangan fuqarolar va tadbirkorlik subyektlariga yetkazilgan moddiy va maʼnaviy zararni qoplash mexanizmi ham belgilandi.
Bunday holatlarda yetkazilgan mulkiy zarar Iqtisodiyot va moliya vazirligi tomonidan fuqarolar va yuridik shaxslarga yetkazilgan mulkiy zararni kompensatsiya qilish jamgʻarmasi hisobidan qoplanadi.
Shu tariqa, tadbirkordan olingan garov mablagʻini qaytarishni kechiktirish davlat organlari uchun ham moliyaviy majburiyat keltirib chiqaradi.
