Tadbirda, shuningdek 2026-yilga moʻljallangan qoʻshma tadbirlarning “yoʻl xaritasi” tasdiqlandi.

Ushbu hujjat xalqaro tajriba, zamonaviy texnologiyalar va idoralararo hamkorlikka tayanib, huquqni muhofaza qilish sohasida yangi avlod kadrlarini tizimli tayyorlash uchun institutsional zamin yaratadi.

Tomonlar huquqni muhofaza qilish va kuch tuzilmalarining istiqbolli xodimlarini saralash hamda tayyorlashning kompleks mexanizmlarini ishga tushirishga kelishib oldi.

Nufuzli xorijiy universitetlar va ilmiy markazlarda maqsadli amaliyotlarni tashkil etish hamkorlikning asosiy yoʻnalishlaridan biri boʻladi. Bunda kiberxavfsizlik, sunʼiy intellekt, robototexnika va dron texnologiyalari kabi strategik yoʻnalishlarga ustuvorlik beriladi.

Shuningdek, tomonlar magistratura va doktorantura bosqichlarida akademik dasturlarni rivojlantirish, prokuratura va boshqa huquqni muhofaza qiluvchi idoralar xodimlari uchun yetakchi xorijiy oliy taʼlim muassasalarida amaliyotlar va malaka oshirish kurslarini tashkil etishni rejalashtirgan. Bunda bitiruvchilarning mansab pillapoyalaridagi oʻsishini monitoring qilish va ularning kelgusidagi kasbiy rivojlanishiga alohida eʼtibor qaratiladi.

Bundan tashqari, memorandumda korrupsiyaga qarshi kurashish, inson huquqlarini himoya qilish, huquqni qoʻllash amaliyotini takomillashtirish va sud-huquq tizimini rivojlantirish kabi sohalarda ilmiy-tadqiqot loyihalarini birgalikda amalga oshirish koʻzda tutilgan, deb xabar beradi “El yurt umidi” jamgʻarmasi matbuot xizmati.