Өзбекстан Илимлер академиясының ANSO Басқарыў кеңесине сайланыўы мәмлекетимиз илиминиң халықаралық майдандағы орны ҳәм абырайлы халықаралық илимий бирге ислесиўдеги белсене қатнасына берилген жоқары баҳа болып есапланады. Бул халықаралық тән алыныў Өзбекстанның турақлы раўажланыў, илимий билим алмасыў ҳәм жас изертлеўшилерди қоллап-қуўатлаў бағдарындағы басламаларына исенимди сәўлелендиреди, деп жазады "Дунё" МА.
Сайлаў нәтийжелери жәрияланғаннан соң Илимлер академиясының вице-президенти, профессор Сирожиддин Мирзаев Өзбекстан Илимлер академиясына билдирилген исеним ушын ANSO шөлкеминиң ағзаларына миннетдаршылық билдирип, Өзбекстан турақлы келешекти тәмийинлеў ушын Азия ҳәм басқа да регионларда илимий бирге ислесиўди беккемлеў, илимди раўажландырыў ҳәм халықаралық илимий-техникалық бирге ислесиўди тереңлестириўге буннан былай да үлес қосатуғынын атап өтти.
ANSO - Халықаралық илимий шөлкемлер альянсы (Alliance of International Scientific Organizations) 2018-жылы Қытай Илимлер академиясының басламасы менен шөлкемлестирилген болып, Азия, Европа, Африка ҳәм Латын Америкасы мәмлекетлериниң 90 нан аслам жетекши илимий мәкемелерин бирлестиреди. ANSO илимий-техникалық потенциалды раўажландырыў, инновациялар ҳәм илим арқалы глобал бирге ислесиўди беккемлеўге қаратылған кең көлемли халықаралық бағдарламаларды әмелге асырмақта.
