Өзбекстан Республикасы Президентиниң 2025-жыл 9-ноябрьдеги 336-санлы
қарарында мәмлекетлик медицина мәкемелериниң медицина ҳәм фармацевтика
хызметкерлерин қоллап-қуўатлаўға қаратылған бир қатар жаңа жеңилликлер
енгизилген.
Қарарға бола,
2026-жыл 1-январьдан баслап мәмлекетлик медицина мәкемелериниң кеминде 15
жыллық мийнет стажына ийе болған медицина ҳәм фармацевтика хызметкерлериниң
республикалық жоқары билимлендириў мәкемелериниң бакалавриат бағдарламалары
бойынша билим алып атырған перзентлерине бир жыллық шәртнама қунының 30
проценти, бирақ базалық есаплаў муғдарының 15 есесинен көп болмаған бөлеги
Қордың қаржылары есабынан қаплап бериледи.
Субсидия алыў
ушын арзаны subsidiya.imv.uz платформасы арқалы электрон формада тапсырыў
мүмкин.
Буннан тысқары,
2026-жыл 1-январьдан баслап Қор қаржылары есабынан төмендеги қоллап-қуўатлаў
илажлары нәзерде тутылған:
емлеўдиң жаңа
усылларын енгизген ҳәм унамлы нәтийжелерге ерискен районлық (қалалық) медицина
мәкемелериниң шыпакерлерине базалық есаплаў муғдарының 50 есеси муғдарында бир
мәртелик ақшалай сыйлық төленеди;
мәмлекетлик
медицина мәкемелериниң медицина ҳәм фармацевтика хызметкерлериниң кеминде 15
жыллық жумыс стажына ийе болған перзентлерине республикадағы жоқары
билимлендириў шөлкемлериниң бакалавриат бағдарламалары бойынша оқыў ушын бир
жыллық контракт баҳасының 30 проценти, бирақ БЕМның 15 есесинен көп болмаған
муғдарда компенсация етиледи;
медицина ҳәм
фармацевтика хызметкерлериниң индексленетуғын халықаралық илимий-техникалық
мағлыўматлар базаларында ҳәм импакт-факторы жоқары журналларда илимий
мақалаларды жәриялаў менен байланыслы қәрежетлери толық қаплап бериледи;
ҳәр жылы
мәмлекетлик медицина мәкемелериниң кеминде 15 жыллық стажға ийе болған 500
медицина ҳәм фармацевтика хызметкерлерине турақ жай сатып алыў ушын ипотека
кредитиниң дәслепки төлеминиң 25 проценти қаплап бериледи.
Сондай-ақ, қарар
менен Денсаўлықты сақлаў министрлиги және Экономика ҳәм қаржы министрлигиниң
2026-жыл 1-январьдан баслап миллий аккредитациядан өткен мәмлекетлик медицина
мәкемелериниң хызметкерлерине лаўазымлық мийнет ҳақысының 10 проценти
муғдарында ҳәр айлық үстеме төлеў ҳаққындағы усынысы мақулланды.
Сондай-ақ,
2026-жыл 1-январьдан баслап мәмлекетлик медицина мәкемелериниң медицина ҳәм
фармацевтика хызметкерлерине төмендеги қосымша жеңилликлер бериледи:
кеминде 3 жыл
стажға ийе хызметкерлерге жылына бир мәрте Мәмлекетлик бюджет қаржылары есабынан
жоқары технологиялы қәнигелестирилген медициналық жәрдем бийпул көрсетиледи;
кеминде 15 жыллық
стажға ийе хызметкерлерге жылына бир мәрте Кәсиплик аўқамлары федерациясы ҳәм
медицина мәкемесиниң қаржылары есабынан республика аймағындағы санаторийлерге
бийпул жоллама бериледи;
барлық түрдеги
мәмлекетлик хызметлер ушын төлем муғдары 2 есеге азайтылады.
Сондай-ақ, режеге
муўапық, 2026-жыл 1-апрельден баслап мәмлекетлик медицина мәкемелери бес күнлик
жумыс ҳәптесине өтеди. Онда, байрам ҳәм дем алыс күнлери медициналық
мәкемелердиң үзликсиз ислеўин тәмийинлеў мақсетинде тастыйықланған график
тийкарында нәўбетшилик шөлкемлестириледи.
