Өзбекстан Республикасы Президентиниң "Фармацевтика тармағын жедел раўажландырыўға байланыслы қосымша илажлар ҳаққында"ғы пәрманы (ПП-13-санлы, 28.01.2025-ж.) қабыл етилди.
Пәрманға бола, Фармацевтика тармағын раўажландырыў агентлигине төмендеги қосымша ўазыйпалар жүкленди:
биологиялық актив қосымшалар ҳәм косметика өнимлери санаатын раўажландырыў, соның ишинде, базар конъюнктурасын үйрениў, таллаў ҳәм өндиристи локализациялаў, усы бағдардағы тараў кәрханаларына алдынғы сырт ел әмелияты ҳәм стандартларын енгизиўге жәрдемлесиў;
жергиликли ҳәкимликлер менен биргеликте аймақлық фармацевтика кәрханаларының инвестициялық жойбарларын мониторинг етиў ҳәм есабын жүргизиў;
фармацевтика тараўын санластырыў ҳәм мәлимлеме бағдарламаларын енгизиў.
2025-жылдың ақырына шекем Фармацевтика өнимлери қәўипсизлиги орайының лабораториясы Жәҳән денсаўлықты сақлаў шөлкеминиң дәслепки квалификация (prequalification) тәртибинен өткериледи.
2025-жыл 1-апрельден:
шекленген саўда үстемелери тек ғана рецепт пенен берилетуғын дәри қураллары категориясына қолланылады;
бир ислеп шығарыўшы тәрепинен түрли саўда атамалары астында қурамы бирдей болған дәри қуралларын ислеп шығарыўда усы дәри қуралларының барлығына салыстырғанда ең төмен референт баҳа қолланылады;
"Фармацевтика өнимлери қәўипсизлиги орайы" тәрепинен сырт ел валютасында белгиленген референт баҳалар белгиленген жағдайларда автоматикалық тәризде (исбилерменниң мүрәжатысыз) қайта көрип шығылады.
