Депутатлар қәўендерлик жумысын әмелге асырыў тәртибин жетилистириўге қаратылған нызам жойбарын биринши оқыўда қабыл етти.
Нызам жойбары арқалы нақ, нақ емес ҳәм мүлк түринде қәўендерлик қаржыларын жыйнаўдың анық тәртиби белгиленбекте.
Жойбарда қәўендерликти мәмлекет тәрепинен қоллап-қуўатлаўдың қосымша механизмлери, қәўендерлик қайырқомлықларын жыйнаў, қайырқомлық қутысын орнатыў ҳәм оннан пайдаланыў тәртиплери, сондай-ақ, қәўендерлик қайырқомлықлары ҳаққындағы мәлимлемени жәриялаў ҳәм бул процесстиң ашық-айдынлығын тәмийинлеў шәртлери белгиленбекте.
Атап айтқанда, енди физикалық шахслар тек ғана өзи ямаса жақын туўысқаны ушын қайыр-сақаўат жыйнаўы мүмкин болады. Волонтёрлар өзине бийтаныс болған шахслардың мәпи ушын қайырқомлық жыйнаўда тек ғана дағаза бериў арқалы жәрдемлеседи.
Қайыр-сақаўат қутысы тек ғана мәмлекетлик емес шөлкемлер ҳәм басқа қәўендер ямаса алыўшы юридикалық шахслар тәрепинен орнатылады. Мәмлекетлик емес шөлкемлер ҳәм басқа да қәўендер ямаса алыўшы юридикалық шахслар нақ пул түриндеги қайырқомлықты тек ғана қайырқомлық қутысы арқалы жыйнайды. Қайырқомлық қутысы ишиндеги көринетуғын ыдыс болады, жайластырылатуғын мәнзил алдыннан жәрияланады, оны ашыўда гүўалар қатнасады ҳәм бул процесс видеоға түсирилип, жәмийетшиликке жәрияланады.
Қайырқомлықларды жыйнаў, қайырқомлық қутыларын орнатыў тәртибин бузғаны ушын ҳәкимшилик жуўапкершилик белгиленбекте.
Нызам жойбарының қабыл етилиўи қәўендерлик қайыр-сақаўатларын жыйнаў тәртибиниң бузылыўының алдын алыў, қәўендерлик шөлкемлери жумысының ашық-айдынлығын тәмийинлеў ҳәм оларға пуқаралардың исенимин арттырыўға хызмет етеди.
