Илаж "Ватандошлар" жәмийетлик фонды ҳәм Миллетлераралық қатнасықлар ҳәм сырт елдеги ўатанласлар ислери бойынша комитети менен биргеликте шөлкемлестирилди, деп хабар бермекте "Дунё" ХА.
Илаждың мақсети сырт елде жасап атырған өзбек жасларының интеллектуал раўажланыўына жәрдемлесиў, өзбекстанлы жаслар арасында дослық ҳәм бирге ислесиўди беккемлеў, миллий өзликти сақлаў, руўхый қәдириятларды үгит-нәсиятлаўдан ибарат.
Ойынға Нью-Йорк, Массачусец, Пенсильвания, Вирджиния ҳәм басқа да штатлардан Өзбекстан жасларынан ибарат 5 команда қатнасты. Ҳәр бир команда 6 қатнасыўшыдан ибарат болып, жәми беллесиўде 30 интеллектуал қәбилетли, белсенди ҳәм билимли жаслар қатнасты.
Оларға АҚШтың түрли аймақларында жасап атырған ўатанласларымыз, сондай-ақ, жәмийетлик ғайраткерлер, исбилерменлер, студентлер, зыялылар, жаслар ҳәм ғалаба хабар қуралларының ўәкиллери белсене жәрдем берди.
Интеллектуал ойын бир неше басқышта өткерилди. Қәнигелер тәрепинен таярланған сораўлар логикалық пикирлеў, тез шешим қабыл етиў, топарда ислеў ҳәм улыўма билимге мөлшерленген.
Таңлаў жуўмағында Нью-Йорк штатының «Ziyo Аrt» командасы ең көп балл топлап, жеңимпаз болды. Жеңимпаз команда ағзалары естелик саўғалары ҳәм баҳалы саўғалар менен сыйлықланды. Қалған командалар да белсене қатнасқаны ушын арнаўлы диплом ҳәм естелик саўғалары менен сыйлықланды.
Ойын жуўмағында қатнасыўшылар ҳәм мийманлар ушын байрам дастурханы жайылып, дәстүрге айланған палаў ҳәм миллий тағамлар қойылды. Өзбекстаннан арнаўлы келген сазенде ҳәм аяқ ойыншылардың қатнасыўындағы мазмунлы ҳәм көтериңки мәдений-кеўилашар бағдарлама ҳақыйқый байрам кейпиятын жаратты.
Ойын қатнасыўшылары бул басламаны үлкен қанаатланыўшылық ҳәм қызығыўшылық пенен қабыл етти. "Заковат" интеллектуал ойыны АҚШтағы ўатанласларымыздың интеллектуаллық потенциалын көрсетиў, олар арасындағы жәмәәтлик бирге ислесиўди беккемлеў, миллий ой-пикир ҳәм мәдениятты үгит-нәсиятлаў, Өзбекстан менен байланысларды және де беккемлеў жолында әҳмийетли қәдем болды.
