Усы жылдың 16-февраль күни Саудия Арабстанында болып өтип атырған "Раўажланып атырған мәмлекетлер қарым-қатнасы" конференциясы шеңберинде Ислам раўажланыў банкиниң президенти Муҳаммад Ал Жассер ҳәм Өзбекстан Республикасы Бас министриниң орынбасары - Экономика ҳәм қаржы министри Жамшид Қўчқоров арасында ушырасыў болып өтти.
Мағлыўмат ушын: Ислам раўажланыў банки 1975-жылы шөлкемлестирилген халықаралық финанс институты болып, оның бас офиси Саудия Арабстанының Жидда қаласында жайласқан. Банктиң тийкарғы мақсети ислам финанслық принциплери тийкарында ағза мәмлекетлердиң экономикалық раўажланыўын қоллап-қуўатлаў ҳәм олардың абаданлығын арттырыўдан ибарат.
Ушырасыўда Ислам раўажланыў банкиниң қатнасыўында әмелге асырылып атырған ҳәм жаңадан ислеп шығылып атырған тийкарғы жойбарларды өз ўақтында әмелге асырыў, олардың ҳәзирги жағдайы, ислениўи керек болған илажлар бойынша ҳәр тәреплеме пикир алысылды.
Сөйлесиў даўамында тәреплер Өзбекстанда транспорт инфраструктурасы ҳәм билимлендириўди раўажландырыў, соның ишинде, жол инфраструктурасы және билимлендириў тараўында заманагөй жойбарларды әмелге асырыў мәселелери бойынша додалаўлар алып барды.
Атап айтқанда, ушырасыў шеңберинде жоқарыдағы бағдарлар бойынша қарыз, агентлик ҳәм грант келисимлерине қол қойылды:
Ислам раўажланыў банкиниң қатнасыўында Өзбекстан аймағынан өтиўши жолларды реконструкциялаў: жойбар шеңберинде Сырдәрья ўәлаяты Ақалтын районы, Мырзабад районы ҳәм Сардоба районындағы улыўма 37 км автомобиль жоллары реконструкцияланады.
"Өзбекстан Республикасында билимлендириўдиң сапасын ҳәм нәтийжелилигин арттырыў" жойбарын әмелге асырыў: жойбар шеңберинде республика бойынша жәми 58 улыўма орта билим бериў мектеплери инклюзив билимлендириў талапларына муўапық қурылады.
Сөйлесиўлер жуўмағында тәреплер өз-ара бирге ислесиў байланысларын және де раўажландырыў ҳәм беккемлеўге келисип алды.
