Ҳүжжет Президент қарарларын, соның ишинде, киши ҳәм орта бизнести, электротехника санаатын раўажландырыў илажларын әмелге асырыўға қаратылған.
Қарар менен Бажыхана зонасында қайта ислеўдиң бажыхана режими ҳаққындағы реже тастыйықланды.
Бажыхана зонасында қайта ислеў бажыхана режимин қолланыўдың әпиўайыластырылған тәртиби төмендегилерди нәзерде тутады:
- сырт ел товарларын қайта ислеў объектлерине алып шығыў;
- қайта ислеў режиминде таярланған өнимди кооперация бойынша басқа ислеп шығарыўшылар тәрепинен буннан былай да терең қайта ислеў ушын бажыхана зонасына жайластырыў;
- биринши жергиликли қайта ислеўшиниң шет елден шийки зат сатып алыў ҳәм ярым таяр өнимлерди кейинги терең қайта ислеў ушын шәртнама тийкарында екинши жергиликли қайта ислеўшиге сатыў ҳуқықы.
Товарлар Бажыхана кодекси ҳәм Режеге муўапық берилген рухсатнама тийкарында бажыхана аймағында қайта ислеў режиминде жайластырылады. Товарларды оңлаў ушын керекли ҳүжжетлер қосымша етилген бажыхана жүк декларациясынан пайдаланылады. Егер оңлаў ушын сырт ел товарларын алмастырыў ямаса жеткерип бериў зәрүр болса, бул тек ғана бажыхана уйымларының рухсаты тийкарында әмелге асырылады.
Айырым түрдеги товарлар ушын қайта ислеў операцияларын әмелге асырыў ушын бажыхана комитетиниң айрықша рухсатнамасын алыў зәрүр.
Қайта ислеў бажыхана режими сырт ел товары статусын сақлап қалады, таяр өним болса бажыхана нызамшылығына муўапық жетерли дәрежеде қайта ислеўдиң белгиленген нормалары бойынша баҳаланады.
Қайта ислеў режиминде жайластырылған товарларды төмендеги шәртлерге әмел еткен ҳалда пайдаланыў мүмкин:
- қайта ислеў мүддетлерине әмел етиў;
- рухсатнамада көрсетилген операцияларды орынлаў;
- қайта ислеўди орынларда ҳәм жуўапкер шахслар тәрепинен әмелге асырыў;
- басқа товарлар менен бажыхана қадағалаўысыз араластырмаў;
- есап-санақ жүргизиў ҳәм бажыхана уйымларына есабат бериў.
Қайта ислеў режими шәртлери жыл даўамында бир неше мәрте бузылған жағдайда, ўәкилликли шахс Бажыхана кодексиниң талапларына муўапық бажыхана төлемлериниң төлениўин тәмийинлеўи шәрт.
Сондай-ақ, ҳүжжет пенен Бажыхана зонасында ҳәм оның сыртында қайта ислеўге рухсат берилетуғын товарлардың дизими тастыйықланды.
Ҳүжжет Нызамшылық мағлыўматлары миллий базасында жәрияланған ҳәм 03.09.2025-жылдан күшке кирди, деп жазады «Norma».
