Мойнақ районындағы Тикөзек аўыл пуқаралар жыйынында жайласқан районлық улыўма орта билим бериў бөлимине қараслы 7-санлы мектепте те Мойнақ районы Шаңарақ ҳәм ҳаял-қызлар бөлими тәрепинен Миллий гвардия бөлими хызметкерлери менен биргеликте үгит-нәсиятлаў илажлы өткерилди.
Мектептиң жоқары класс оқыўшылары арасында өткерилген илажда сөзге шыққанлар келешегимиз болған жасларға тәртип-интизам, тазалық, ийбелик ҳаққында, сондай-ақ, кәсип-өнер үйрениўдиң зәрүрлиги, китапқумарлықты ен жайдырыў, кийиниў әдебин сақлаў ҳәм басқа да мәселелер бойынша пайдалы мәсләҳәтлерин берди.
Мектепте өткерилген илажда Мойнақ районы Шаңарақ ҳәм ҳаял-қызлар бөлиминиң баслығы Б.Жамалова оқыўшылардың сабаққа қатнасы, кийиниў мәденияты, тәртиби, әдебий китапларды көп оқыўы, Президентимиз тәрепинен жасларға, әсиресе, ҳаял-қызларға жаратылып атырған имканиятлардан утымлы пайдаланыўы бойынша түсиниклер берди.
Сондай-ақ, питкериўши класс оқыўшыларына ерте турмыс қурмай, оқыўды питкерип жоқары мағлыўматлы болып өзлери қәлеген кәсиптин маманы болыўына шақырды.
Илажда қатнасыўшылар өзлерин қызықтырған сораўларға жуўап алды.
Қарақалпақстан хабар агентлиги.
