Изертлеўшилер 500 ге шамалас үй пышықларының өспелериниң ДНКсын анализлеп, кеселликтиң раўажланыўына байланыслы тийкарғы генетикалық мутацияларды анықлады. Рак пышықлар арасында кеселлик ҳәм өлимшиликтиң тийкарғы себеплеринен бири болыўына қарамастан, оның пайда болыў механизмлери елеге шекем жетерлише үйренилмеген, деп жазады bbc.com.
- Ҳәзирги күнге шекем пышықлардағы рак кеселлигиниң генетикасы дерлик үйренилмеген тараў болып келген, - деп атап өтти жетекши изертлеўши доктор Луиза Ван дер Вайден. - Рак кеселлигиниң қайсы түринен болса да көбирек мағлыўмат алсақ, ҳәммеге үлкен пайда келтиреди.
Кембридждеги Уэлком Сенгер институты басшылығындағы халықаралық илимпазлар топары пышық рак кеселлигиниң 13 түрине байланыслы мыңға шамалас генлерди үйренди.
Нәтийжелер пышықта рак кеселлигиниң раўажланыўына жуўапкер болған көплеген генлер адамда да бар екенлигин көрсетти. Бул еки түрдеги өспелердиң өсиўи ҳәм тарқалыўының тийкарында улыўма биологиялық механизмлер бар екенлигинен дерек береди.
Изертлеўшилерди сүт бези ракының формалары айрықша қызықтырды. Илимпазлардың айтыўынша, үй пышықлары көкирек бези ракының үш отрядын үйрениў ушын әҳмийетли модель болыўы мүмкин - бул кеселликтиң агрессив киши типи болып, ол адамлардағы сүт бези ракы барлық жағдайларының шама менен 15% ин қурайды.
Пышықларда бул киши түр көбирек ушырасады, бул изертлеўшилерге көбирек анализ ушын үлгилерди береди ҳәм жаңа дәри-дәрмақ ислеп шығарыў ушын қосымша имканиятлар ашып береди.
Изертлеў авторларының пикиринше, пышықлардағы рак кеселлигиниң генетикалық өзгешеликлерин және де терең үйрениў кеселликтиң тәбиятын тереңирек түсиниўге жәрдем береди ҳәм ҳайўанлар ушын да, адам ушын да нәтийжелирек емлеў усылларын табыўды тезлестиреди.
